Robben byrjaður að æfa á ný

Arjen Robben, leikmaður Bayern München, er byrjaður að æfa á ný eftir þriggja vikna fjarveru vegna meiðsla.

Robben meiddist í 4-0 sigri Bayern á Olympiacos í Meistaradeild Evrópu 24. nóvember og hefur ekki spilað síðan þá og misst af fimm leikjum þýsku meistaranna.

Það er þó óvíst hvort Robben nái leiknum gegn Hannover 96 á laugardaginn, sem er síðasti leikur Bayern fyrir vetrarfrí.

Robben hefur skorað fimm mörk í 12 leikjum á tímabilinu en hann mun styrkja lið Bayern til mikilla muna þegar hann snýr aftur.

Bayern er með fimm stiga forskot á Borussia Dortmund á toppi þýsku úrvalsdeildarinnar og þá er liðið komið áfram í þýsku bikarkeppninni og Meistaradeildinni.