Guardiola: Framtíðin skýrist í næstu viku

Pep Guardiola, stjóri Bayern München, segir að framtíð hans muni skýrast betur í næstu viku en samningur hans við þýska félagið rennur út í sumar.

„Ég hef ekkert svar við spurningum ykkar í kvöld. Þetta skýrist allt saman í næstu viku,“ sagði Guardiola eftir 1-0 sigur Bayern á Darmstadt í þýsku bikarkeppninni í gær.

Guardiola hefur verið sterklega orðaður við bæði Manchester-félögin og fullyrti Ottmar Hitzfeld, fyrrum stjóri Bayern, að Spánverjinn muni næst taka við City. Frank Beckenbauer hefur hins vegar sagt að Guardiola gæti freistast til að ráða sig til United.

Sjá einnig: Hitzfeld: Guardiola fer til Man City næsta sumar

Síðan að Guardiola tók við Bayern árið 2013 hefur hann unnið tvo Þýskalandsmeistaratitla auk orðið þar að auki bikarmeistari og heimsmeistari félagsliða.