Æsir sig ekki upp fyrir lyfturnar

 „Ég er bara búin að brosa síðan. Ég er ótrúlega stolt að hafa klárað þetta,“ segir Fanney Hauksdóttir kát en hún varð heimsmeistari annað árið í röð á föstudaginn.

Fanney mældist bara 60,96 kíló í opinberri vigtun fyrir mót en hún reif engu að síður 145,5 kíló upp í úrslitum 63 kílóa flokksins á HM unglinga í bekkpressu í Svíþjóð. Frammistaða þessa 22 ára Seltirnings er heldur betur komin í sögubækurnar eftir tvö HM-gull og nú fylgdi heimsmet með í kaupbæti.

Pínu pressa á henni

„Það var pínu pressa. Ég vildi ekki vita of mikið um hana en ég fann alveg fyrir henni,“ segir Fanney um þá staðreynd að þessu sinni mætti hún til leiks sem ríkjandi heimsmeistari.

„Það kom eiginlega ekkert annað til greina en að setja þetta heimsmet á mínu síðasta ári í unglingaflokki,“ segir Fanney en hún setti Íslandsmet í bekkpressu árið 2013 og það var 115 kg. Hún hefur tekið risastökk síðan þá. Í fyrra vann hún HM-gullið á lyftu upp á 135 kíló en nú lyfti hún tíu kílóum meira.

„Þetta er vissulega mikil bæting en ég breytti tækninni minni á þessum tíma og æfði miklu meira. Það þýðir ekkert annað en að gefa í,“ segir Fanney. Hún segist ekkert hrædd við að bæta við lóðum á stöngina.

Á inni fyrir aukakílóunum

„Þjálfarinn myndi aldrei setja á mig einhverja þyngd sem ég réði ekki við. Við vinnum þetta bara í sameiningu og ég tek bara eitt skref í einu og fer ekki í eitthvað sem ég ræð ekki við. Ef maður æfir vel og jafnt og þétt þá á maður inni fyrir þessum aukakílóum sem maður setur á stöngina. Það þýðir ekkert að vera smeykur,“ segir Fanney.

Eftir sigurinn glæsilega fyrir ári hefur Fanney unnið einbeitt að því að mæta enn sterkari til leiks í titilvörninni. „Ég er eiginlega búin að vera í æfingasalnum síðan ég varð síðast heimsmeistari,“ segir Fanney hlæjandi.

Keppnin í ár var þó ekki alveg dans á rósum því fyrsta lyfta hennar var dæmd ógild. Það mátti því ekkert klikka í annarri lyftu af þremur. „Þetta var náttúrulega pínu stress af því að ég náði ekki fyrstu lyftu. Ég fann það alveg að ég var með þyngdina og vissi því alveg hvað ég þyrfti að gera til að bæta mig í annarri lyftu,“ segir Fanney en hún gerði fjölskyldumeðlimunum kannski mestan grikkinn með þessu.

„Það voru allir svolítið stressaðir eftir fyrstu lyftu og ég skil það svo sem alveg. Eftir að fyrsta lyftan klikkaði þá kom bara meiri andi og ég bara kláraði þetta,“ segir Fanney.

Heimsmetslyfta Fanneyjar hefði einnig dugað til sigurs í 72 kílóa flokknum. „Þetta er rúm tvöföld líkamsþyngd. Það er ágætt,“ segir Fanney hógvær. Hún segist ekki vera alveg eins viss um framhaldið og fyrir ári þegar það lá ljóst fyrir að hún ætti inni annað ár í unglingaflokknum.

„Það er kannski ekki eins auðvelt að setja sér næstu markmið. Ég klára árið í unglingaflokki og svo tekur bara við opni flokkurinn sem er mun sterkari. Ég sest bara niður og finn út næstu markmið. Núna er ég bara enn þá að lifa á föstudeginum,“ segir Fanney og það er ekkert skrítið. Fanney breytist ekki í neitt óargadýr rétt fyrir lyftu þrátt fyrir að hún þurfti að beisla allan sinn kraft í rétta átt.

Ef ég næ mér inn í þessa einbeitingu þá gengur mér best

„Það eru margir sem reyna að espa sjálfan sig upp fyrir lyftu en ég er ekki þar. Ég tek ekki eftir þeim sem eru að horfa á. Ég labba bara inn og næ gjörsamlega að einbeita mér að stönginni og svo yfirdómaranum sem ég þarf að hlusta á. Ef ég næ mér inn í þessa einbeitingu þá gengur mér best,“ segir Fanney.

„Það er svolítið skemmtilegt,“ segir Fanney aðspurð um þá staðreynd að hún getur haldið á heimsmeistaragulli í hvorri hendinni. En hvor sigurinn var sætari? „Sigurinn í fyrra var óvæntari. Þá kom ég og vissi ekki hvað ég var að fara að gera. Ég bjóst því alls ekki við gullinu. Núna var ég að koma til að verja heimsmeistaratitilinn og það er öðruvísi,“ segir Fanney.

„Ég vann aftur allan unglingaflokkinn og ekki bara minn flokk. Það var líka markmið sem ég var ekki mikið að tala um,“ segir Fanney en þar eru lyftur settar í hlutfallslegan samanburð við líkamsþyngd.

„Það er skemmtilegt að taka það með ellefu stigum. Það er gaman að skoða stigin og sjá hvar maður stendur í samanburði við allar hinar,“ segir Fanney.

Tvöfaldur heimsmeistari og heimsmetshafi. Þessi lífsglaða og kraftmikla íþróttakona má alveg monta sig þessa dagana en það má búast við því að hún láti verkin tala eins og hingað til.