Dreifa gleðinni gegnum sönginn

Hinsegin kórinn var stofnaður árið 2011 og hefur tekið þátt í Hinsegin dögum frá upphafi með ýmsum hætti. Kórinn söng á opnunarhátíð Hinsegin daga í Hörpu á fimmtudag, hélt vel heppnaða tónleika í Fríkirkjunni í Reykjavík í gærkvöldi og tekur þátt í gleðigöngunni í dag.

Kórinn er hugmynd Ástu Óskar Hlöðversdóttur sem kynntist sambærilegum kórum þegar hún stundaði nám erlendis. Hún hóf undirbúning að stofnun hans með öðru góðu fólki síðsumars árið 2011 en Helga Margrét Marzellíusardóttir, söngkona og kórstjóri, hefur stýrt kórnum frá upphafi. Helga Margrét segist hafa verið spurð í atvinnuviðtalinu hvers vegna hún vildi taka þetta starf að sér og svarað á þá leið að hún hlyti að læra helling af því. „Sem hefur staðist og rúmlega það. Þessi hópur er sá allra, allra besti sem ég hef starfað með, að öllum öðrum ólöstuðum. Hann hefur verið mér uppspretta mikillar gleði og verið um leið bæði mikill og nauðsynlegur skóli og ævintýr.“



Fjölbreytt efnisval

Ólíkir einstaklingar skipa Hinsegin kórinn sem hafa um leið ólíkan bakgrunn. „Sumir hafa lært söng eða verið í tónlistarnámi meðan aðrir hafa stigið sín fyrstu skref með okkur. Kórinn flytur líka mjög fjölbreytt efni og meðlimir hans eru opnir fyrir hvers konar tónlist. Enda verður efnisvalið fjölbreyttara með hverju árinu þar sem getan verður bæði meiri og kórmeðlimir verða forvitnari og metnaðarfyllri. Á vortónleikunum sungum við allt frá íslenskum þjóðlögum og íslenskri samtímakóratónlist til Queen og Tinu Turner.“



Mikilvæg tímasetning

Í gær hélt kórinn vel heppnaða tónleika í Fríkirkjunni í Reykjavík fyrir fullu húsi. „Eins og venjulega var efnisvalið fjölbreytt og stemningin var virkilega góð. Undanfarin ár höfum við fengið góða gesti til liðs við okkur og í gær söng karlakórinn Esja með okkur. Esja er ungur kór en þeir hafa verið að gera það gott og slá í gegn hvar sem þeir syngja.“

Hún segir mikilvægt fyrir kórinn að halda tónleika á þessum tíma og taka þannig þátt í glæsilegri dagskrá Hinsegin daga. Um leið sé skemmtilegt að fá gesti á tónleikana sem eru sérstaklega í Reykjavík vegna hátíðarhaldanna. „Til að mynda höfum við fengið erlendan gest á tónleika okkar sem hefur svo heimsótt okkur á æfingar í kjölfarið. Hann íhugar nú að dvelja lengri tíma á landinu ár hvert til þess eins að geta fengið að syngja með okkur á tónleikum. Það þykir okkur ekki leiðinlegt.“

Jafnvel sungið og dansað

Sem fyrr segir hefur kórinn gengið með í gleðigöngunni frá stofnun en Helga Margrét segir mikilvægt fyrir kórinn að sýna sig og kynna starfið fyrir sem flestum. „Við göngum og spilum tónlist sem tekin hefur verið upp á tónleikum okkar og syngjum jafnvel og dönsum smá í þeim lögum þar sem það á við. Enda er eitt af markmiðum kórsins að dreifa gleði í gegnum söng. Við viljum einnig meina að þátttaka okkar í göngunni hjálpi til með að uppfylla þau markmið sem við setjum okkur, þ.e. að vera fordómalaus vettvangur fólks til að hittast og njóta söngs saman, vinna að þátttöku hinsegin fólks í menningarlífinu, vera jákvæð fyrirmynd og stuðla að sýnileika hinsegin fólks.“



Ógleymanleg ferð

Þrátt fyrir að hafa starfað í nokkur ár hefur kórinn ferðast víða og um leið fengið góðar heimsóknir erlendis frá. „Eftir fyrsta starfsárið okkar fórum við í heimsókn til Færeyja og tókum þátt í fyrstu gleðigöngunni sem Færeyingar héldu í mörg ár. Þetta var ógleymanleg ferð því gangan tókst vonum framar og við fundum að við gátum lagt baráttunni lið og vorum í raun að upplifa stórt skref í hinsegin baráttunni í Færeyjum. Það var ljúf stund að ganga niður í miðbæ Þórshafnar þann dag.“

Síðastliðið sumar tók kórinn þátt í Hinsegin kóramóti í Dublin ásamt um 1.500 manns. „Ungi kórinn frá Íslandi fékk þar frábærar móttökur og söng meðal annars fyrir fullum 1.200 manna sal. Þetta var auðvitað mjög skemmtilegt og móttökurnar ekki síður mikil viðurkenning á okkar starfi.“



Heilmikill lærdómur

Í sumar hélt kórinn til London og heimsótti vinakór sinn, Pink Singers, sem er elsti hinsegin kór Evrópu. „Pink Singers heimsótti okkur sumarið 2013 og við héldum saman tónleika. Kórarnir náðu einstaklega vel saman og þá var strax ákveðið að við myndum hittast aftur fljótlega. Við héldum síðan flotta tónleika með þeim í gamalli kirkju í London fyrr í sumar.“

Helga Margrét segir mikilvægt að hitta aðra kóra og kynnast því hvernig þeir starfa. „Við lærum heilmikið af öllum ferðunum og heimsóknum sem við fáum. Kórstjóri Pink Singers er söngþjálfari hjá Ensku þjóðaróperunni í London og fór ég með honum þangað og fékk kynningu á starfseminni. Um leið hefur verið virkilega gefandi fyrir mig að komast í samband við reynslumikla kórstjóra og raddþjálfara en allt skilar þetta auknum krafti inn í starf okkar.“



Annasöm vika

Vikan er búin að vera annasöm hjá Helgu Margréti. „Kórinn æfði alla daga vikunnar sem endaði með tónleikunum. Einnig söng ég og hlustaði á frábæra Stellutónleika á þriðjudagskvöld í Iðnó. Á fimmtudag sungum við í Hörpu á opnunarhátíð Hinsegin daga en hún var afskaplega hátíðleg og vel heppnuð. Stemningin var frábær og öll atriðin líka. Í dag er auðvitað gangan sjálf en þar mun ég ganga með kórfélögum, fjölskyldum þeirra og vinum. Seinni hluta dags mun ég svo eyða með vinum og aldrei að vita nema maður endi á balli Hinsegin daga sem haldið er í Iðnó í kvöld.“

Hún nær þó ekki að sofa lengi út á morgun enda búin að ráða sig í tónlistarverkefni sem þarfnast bæði vinnu og skipulags. „Þrátt fyrir þetta allt vildi ég óska þess að ég gæti tekið meiri þátt í öllum fræðsluviðburðum Hinsegin daga. Ég vil meina að dagskráin hafi aldrei verið eins glæsileg og í ár. Stjórn Hinsegin daga á heiður skilinn fyrir og ég vona að sem allra flestir mæti. Strax eftir helgi fara svo fram raddprufur fyrir Hinsegin kórinn og hvet ég alla áhugasama til að mæta. Nánari upplýsingar má finna á Facebook-síðunni Raddprufur Hinsegin kórsins.“

Dagskrá Hinsegin daga má finna hér.