Pep Guardiola vill taka við liði í ensku úrvalsdeildinni

Pep Guardiola, þjálfari þýsku meistarana í Bayern München, hefur nú staðfest þann þráðláta orðróm að hann sé á leiðinni í ensku úrvalsdeildina í sumar.

Guardiola sagði ástæðuna fyrir því að hann framlengdi ekki samning sinn við Bayern vera þá að hann vilji fá tækifæri til að stýra liði í ensku úrvalsdeildinni.

Pep Guardiola talaði um þetta á fyrsta blaðamannafundi sínum síðan að hann tilkynnti að hann yrði ekki áfram með Bayern eftir þetta tímabil.

„Ég hef ekki enn ákveðið hvaða félag ég tek við. Ég vil fá tækifæri til að kynnast nýrri borg og ég vil fá að vinna í Englandi. Það er ástæðan fyrir þessari ákvörðun," sagði Guardiola.

„Ég hef fengið nokkuð tilboð frá Englandi en ég hef ekki skrifað undir neitt ennþá. Ef ég væri orðinn 60 eða 65 ára þá færi ég ekki frá Bayern. Ég er það ungur að ég þarf að fá nýja áskorun," sagði Pep Guardiola.

„Það er enn mikið eftir af mínum ferli og þegar ég sem við nýtt félag þá mun það félag sjá um að tilkynna það. Ég get ekkert sagt eins og er enda er ekki búið að ganga frá neinu," sagði Guardiola.

Pep Guardiola verður 45 ára seinna í þessum mánuði en hann hefur stýrt Bayern München frá árinu 2013 en var þjálfari Barcelona frá 2008 til 2012.

Bayern München hefur unnið fimm titla undir hans stjórn og hann vann fjórtán titla á fjórum tímabilum með Barcelona.