Enn vinnur Hellas ekki leik

Emil Hallfreðsson spilaði allan leikinn fyrir Hellas Verona sem gerði sitt tíunda jafntefli í ítölsku úrvalsdeildinni í knattspyrnu í dag. Hellas gerði nú jafntefli við Genoa 1-1.

Ferdinando Coppola skoraði sjálfsmark fyrir Hellas á nítjándu mínútu og Genoa komið yfir. Giampaolo Pazzini jafnaði metin á 40. mínútu og lokatölur 1-1.

Þetta var tíunda jafntefli liðsins á tímabilinu, en liðið hefur tapað hinum ellefu leikjunum. Enginn sigurleikur kominn í hús hjá Verona, en þeir eru langneðstir með tíu stig, þrettán stigum frá öruggu sæti.

Napoli er á toppinum með fimm stiga forskot eftir 4-2 sigur á Sampdoria, en Juventus á þó leik til góða gegn Roma í kvöld. Gonzalo Higuain, Lorenzo Insigne, Marek Hamsik og Dries Mertens skoruðu mörk Napoli.

Öll úrslit dagsins:

Fiorentina - Torino 2-0

Hellas Verona - Genoa 1-1

Inter - Carpi 1-1

Lazio - Chievo Verona 4-1

Palermo - Udinese 4-1

Sampdora - Napoli 2-4

Sassulo - Bologna 0-2