Ríkissaksóknari áfrýjar máli Annþórs og Barkar

Embætti ríkissaksaksóknara hefur áfrýjað sýknudómi Héraðsdóms Suðurlands yfir Annþóri Kristjáni Karlssyni og Berki Birgissyni. Þeir eru sakaðir um að hafa veitt fanganum Sigurði Hólm Sigurðssyni áverka í fangaklefa hans á Litla Hrauni sem drógu hann til dauða í maí árið 2012.

Fer embættið fram á að Annþór og Börkur verði dæmdir til refsingar fyrir þá háttsemi sem þeim er gefið að sök í ákæru.

Sigurður Hólm lést í maí árið 2012 en ákæra var gefin út gegn Annþóri og Berki ári síðar. Þeir voru sýknaðir af ákæru ríkissaksóknara 23. mars síðastliðinn.

Var ríkið dæmt til að greiða sakarkostnað í málinu, en málsvarnarkostnaðurinn nemur rúmum 30 milljónum króna. Helgi Magnús Gunnarssonar vararíkissaksóknari fór fram á tólf á fangelsisdóm yfir Annþóri og Berki.

Annþór og Börkur afplána nú sjö og sex ára fangelsisdóma sem féllu haustið 2013 fyrir grófa líkamsárás í janúar 2012.