Hjálmar byrjaði 14. tímabilið hjá IFK Göteborg á sigri

Hjálmar Jónsson lék allan leikinn í miðri vörn IFK Göteborg sem vann 0-2 sigur á Falkenbergs í 1. umferð sænsku úrvalsdeildarinnar í fótbolta í dag.

Hjálmar er að hefja sitt fjórtánda tímabil í herbúðum Göteborg en hann kom til liðsins frá Keflavík árið 2002.

Mads Albæk kom Göteborg yfir með marki úr vítaspyrnu á 39. mínútu og Tobias Hysén bætti öðru marki við á þeirri 58.

Hjörtur Logi Valgarðsson lék ekki með Örebro sem tapaði 0-2 fyrir Djurgården á heimavelli.