GM með methagnað

Nýtt ár byrjar vel hjá General Motors og fyrsti ársfjórðungurinn skilaði fyrirtækinu methagnaði. GM hagnaðist um 244 milljarða króna á þessum þremur mánuðum og ríflega tvöfaldaðist hagnaðurinn frá fyrra ári. Þessi ágæti hagnaður General Motors varð meiri en spá greinenda á bílamarkaði.

Þó svo að GM hafi hagnast svo vel var salan 2,5% minni en á sama tíma á síðasta ári og seldi fyrirtækið 2,36 milljón bíla. Vel gekk hjá GM að selja bíla í Kína, sérstaklega jeppa og jepplinga og ágætlega gengur að selja í Evrópu, auk þess sem markaðshlutdeild GM jókst á heimavelli í Bandaríkjunum og þar seldust 800.000 bílar.

Meðalverð seldra bíla í Bandaríkjunum hækkaði talsvert á milli ára þar sem einkar vel gekk að selja dýrari gerðir bíla GM, sérstaklega jeppa og pallbíla. Meðalverðið á fyrsta ársfjórðungi var 34.600 dollarar, eða 4,3 milljónir króna. Er það talsvert hærra verð en meðalverð allra seldra bíla bílaframleiðenda.

Sala Opel og Vauxhall bíla í Evrópu jókst um 8,4% á milli ára og reksturinn þar komst loksins á núllið, en viðvarandi tap hefur verið á rekstri þessara tveggja merkja í eigu GM. Tapið í S-Ameríku varð helmingi minna en árið áður, en góður hagnaður varð af rekstrinum í Kína.