Stórt snjó­flóð við Siglu­fjörð og veginum lokað

Ólíver Hilmarsson, ofanflóðasérfræðingur hjá Veðurstofu Íslands, staðfestir þetta í samtali við fréttastofu. 

Viðvarandi hætta á snjóflóðum hefur nú verið á norðanverðum Vestfjörðum síðan á miðvikudaginn. Óvissustig er nú í gildi þar eftir hættustig síðustu daga. Óvissustig er einnig í gildi í Eyjafirði innanverðum en á Tröllaskaga utanverðum er búið að færa óvissustig yfir á hættustig. Búið er að loka umferð um Siglufjarðarveg vegna snjóflóðahættu en stórt snjóflóð þveraði veginn í nótt.

Á vef Veðurstofunnar er hægt að fylgjast með þróun mála. Þar má meðal annars sjá snjóflóð sem varð klukka tólf um hádegi í gær að stærð þrjú en það var rétt fyrir utan Ólafsfjörð. Einnig urðu mörg smærri flóð um klukkan 03:00 í nótt, en þrátt fyrir að vera flest á Norðurlandi og á Vestfjörðum eru einnig einhver flóð á austfjörðum.  

Gular veðurviðvarnir taka gildi á Norðvesturlandi og á Vestfjörðum í nótt. Búið er að opna umferð um Súðavíkurhlíð og Flateyrarveg eftir að þeim var lokað í vikunni. 

„Gera má ráð fyrir að umtalsverð snjósöfnun hafi átt sér stað og að flekar hafi myndast í suðlægum viðhorfum. Mjög stórt flóð féll í Selskál yfir Siglufjarðarveg síðustu nótt,“ segir á vef Veðurstofunnar.