UEFA kærir Ungverja, Belga og Portúgala | Myndir

UEFA, Knattspyrnusamband Evrópu, hefur kært knattspyrnusambönd Ungverjalands, Belgíu og Portúgals fyrir ólæti stuðningsmanna liðanna á EM 2016 í Frakklandi í gær.

Hluti stuðningsmanna Ungverjalands lét öllum illum látum fyrir leik liðsins gegn Íslandi í Marseille í gær. Ungverjarnir lentu í útistöðum við öryggisverði þegar þeir reyndu að klifra yfir hlið til að komast inn í hólf í stúkunni sem var ætlað Íslendingum.

Fyrir vikið þurftu margir stuðningsmenn Íslands að bíða í nokkurn tíma fyrir utan Stade Vélodrome eftir því að komast inn á völlinn.

Stuðningsmenn Ungverja kveiktu líka á blysum og hentu þeim inn á völlinn á meðan á þjóðsöngvunum stóð, þegar Ísland fékk vítaspyrnu undir lok fyrri hálfleiks og eftir að ungverska liðið jafnaði í blálokin.

Hér að ofan má sjá myndir frá ólátum ungversku stuðningsmannanna á Stade Vélodrome í gær.

Belgísku stuðningsmennirnir gerðust sekir um það sama í leik Belga og Íra á meðan að Portúgalar eru í vandræðum vegna stuðningsmanns sem hljóp inn á Parc des Princes í París eftir að lokaflautið gall í leik Portúgals og Austurríkis til að fá mynd af sér með Cristiano Ronaldo.

Sjá einnig: Þjálfari Króatíu: Þetta eru íþróttahryðjuverkamenn

Mikið hefur verið um ólæti stuðningsmanna á EM en auk ofannefndra þjóða hafa stuðningsmenn Rússa, Englendinga og Króata verið til vandræða.