Metfjöldi umsókna um hæli hér á landi

Alls hafa 235 umsóknir borist Útlendingastofnun á þessu ári um vernd hér á landi. Á sama tímabili í fyrra sóttu aðeins 64 einstaklingar um vernd hér á landi og er því um mikla fjölgun að ræða. Maímánuður í ár er einnig stærsti mánuður ársins en 56 umsóknir bárust í þeim mánuði einum.

Þetta kemur fram í tilkynningu Útlendingastofnunar sem birtist á heimasíðu þeirra. Flestar umsóknir í maímánuði komu frá Albaníu, eða 24 talsins. Níu að auki komu frá Makedóníu.

Sex af hverjum tíu umsækjendum um vernd á Íslandi koma frá Balkanskaga en einstaklingar frá þeim löndum fá sjaldan umsókn um vernd samþykkta hér á landi.

Niðurstaða fékkst í 75 mál í maímánuði. Níu einstaklingar fengu vernd hér á landi en hinum var hafnað eða umsóknir þeirra ekki teknar til efnislegrar meðferðar af Útlendingastofnun af ýmsum ástæðum. Þegar maí var liðinn voru enn 153 mál til meðferðar hjá stofnuninni.