„Ronaldo er stærri en Portúgal“

„Væntingarnar fyrir mótið eru miklar. Þegar þú ert með Cristiano Ronaldo í þinu liði eru væntingarnar alltaf miklar.“

Þetta segir Pedro Ponte, blaðamaður á portúgalska íþróttablaðinu Record, í samtali við Vísi um landslið Portúgals en það mætir Íslandi í fyrsta leik liðanna í F-riðli EM 2016 í kvöld.

Portúgal er líklegt til afreka á mótinu enda með annan af tveimur bestu leikmönnum heims innan sinna raða. Ponte segir leikmenn Portúgals hafa varann á þegar kemur að Íslandi.

„Það er búið að vara portúgölsku leikmenninna við sóknarmönnum Íslands. Þeir sýna íslenska liðinu mikla virðingu þannig ég held að þetta verði frábær leikur. Portúgal er samt líklegra til sigurs,“ segir Pedro.

Portúgalska liðið er með frábæra blöndu eldri og yngri leikmanna en má segja að þetta sé besta portúgalska liðið í svona 6-7 ár?

„Það má segja það. Það voru margir meiddir á HM 2014 sem fór illa. Nú undir stjórn Fernando Santos hefur liðsandinn verið endurvakinn. Hann er reynslumikill sem er gott fyrir ungu leikmennina. Þetta eru ungir strákar en þeir eru að spila í góðum liðum sem er mikilvægt,“ segir Pedro.

„Ronaldo er stjarnan en það eru margir ungir leikmenn í portúgalska liðinu sem munu fá tækifæri og munu sýna hversu góðir þeir eru.“

Ponte segir portúgölsku þjóðina algjörlega elska Cristiano Ronaldo en hann er orðinn miklu stærri en liðið. Fyrir blaðamann eins og hann er erfitt að ná til stórstjörnunnar.

„Hann fer bara til Portúgal þegar landsliðið er að spila. Það er mjög erfitt að ná til hans. Spænskir fjölmiðlar segja þér eflaust aðra sögu en ég því þeir tala oftar við hann. Hann er mjög almennilegur maður en það er erfitt að fá viðtal við hann,“ segir Ponte.

„Ronaldo er risastór og stærri en Portúgal. Hann er merkasti maður Portúgal í dag. Væntingarnar eru miklar og það er út af honum.“

En hvernig taka leikmennirnir því þegar áhugi allra blaðamanna snýr nánast eingöngu að Ronaldo? "Þeir eru vanir þessu. Þeir eru alltaf spurðir út í Ronaldo og þeir segja alltaf að hann sé fyrirmynd þeirra allra. Leikmennirnir skilja að hann er besti leikmaður heims ásamt Lionel Messi,“ segir Pedro Ponte.

Allt viðtalið má sjá hér að ofan.

Ekki missa af neinu sem gerist á EM í Frakklandi. Vísir er með hóp fjölmiðlamanna á mótinu sem færa ykkur allar nýjustu fréttirnar af strákunum okkar. Fylgdu okkur á Facebook, Twitter og Snapchat (sport365).