Fótbolti

Draumamark Shaqiri dugði ekki til og Pólverjar fóru áfram | Sjáðu mörkin

Ingvi Þór Sæmundsson skrifar
Pólverjar fagna sætinu í 8-liða úrslitum.
Pólverjar fagna sætinu í 8-liða úrslitum. Vísir/EPA
Pólverjar urðu nú rétt í þessu fyrsta liðið til að tryggja sér sæti í 8-liða úrslitum á EM 2016 eftir sigur á Sviss eftir framlengdan leik og vítaspyrnukeppni.

Staðan var 1-1 eftir venjulegan leiktíma og hvorugu liðinu tókst að skora í framlengingunni og því þurfti að grípa til vítakeppni.

Þar sýndu leikmenn Póllands gríðarlegt öryggi og skoruðu úr öllum fimm spyrnum sínum. Svisslendingar skoruðu úr fjórum en Granit Xhaka, nýjasti leikmaður Arsenal, skaut langt framhjá úr sinni spyrnu.

Pólverjar byrjuðu leikinn af miklum krafti og strax eftir nokkurra sekúndna leik skaut Arek Milik yfir úr dauðafæri.

Pólska liðið komst yfir á 39. mínútu þegar Jakub Blaszczykowski rak smiðshöggið á frábæra skyndisókn. Þetta var 18. landsliðsmark Blaszczykowskis en Pólland hefur aldrei tapað leik sem hann skorar í. Það varð engin breyting þar á í dag.

Shaqiri jafnaði metin með mergjuðu marki.vísir/epa
Staðan var 0-1 í hálfleik en svissneska liðið kom ákveðnara til leiks í seinni hálfleik og fór að ógna marki Pólverja sem fengu ekki á sig mark í riðlakeppninni.

Lukasz Fabianski varði aukaspyrnu Ricardos Rodríguez á 73. mínútu og fimm mínútum síðar skaut Haris Seferovic í slána.

Stíflan brast svo á 82. mínútu þegar Xherdan Shaqiri klippti boltann glæsilega í stöng og inn og jafnaði metin. Algjörlega magnað mark hjá Shaqiri sem spilaði sinn besta leik á EM í dag.

Í framlengingunni var Sviss sterkari aðilinn en tókst ekki að skora sigurmarkið. Varamaðurinn Eren Derdiyok komst næst því á 113. mínútu en Fabianski varði skalla hans af stuttu færi frábærlega.

Vítakeppnin (Sviss byrjar):

1-0 Stephan Lichtsteiner skorar

1-1 Robert Lewandowski skorar

1-1 Granit Xhaka skýtur framhjá

1-2 Arek Milik skorar

2-2 Xherdan Shaqiri skorar

2-3 Kamil Glik skorar

3-3 Fabian Schär skorar

3-4 Jakub Blaszczykowski skorar

4-4 Ricardo Rodríguez skorar

4-5 Grzegorz Krychowiak skorar

Milik klúðrar dauðafæri Błaszczykowski kemur Pólverjum yfir Stórkostlegt jöfnunarmark Shaqiri Krychowiak skorar úr síðustu spyrnu Pólverja
EM 2016 í Frakklandi

Mest lesið


Fleiri fréttir

Sjá meira


×

Mest lesið