Það var svona gaman að fá mynd af sér með Neuer

Ungur, norskur knattspyrnuáhugamaður datt heldur betur í lukkupottinn í fyrradag.

Drengurinn ungi náði að lauma sér inn á Ullevaal-völlinn í Osló eftir að Þjóðverjar höfðu pakkað Norðmönnum saman í undankeppni HM 2018.

Drengurinn átti sér eitt markmið. Fá mynd af sér með goðinu sínu - þýska markverðinum Manuel Neuer.

Neuer tók drengnum vel og brosti fyrir hann í myndavélina.

Viðbrögð drengsins í kjölfarið voru ekkert minna en stórkostleg. Hann rauk af velli fagnandi eins og hann hefði skorað sigurmarkið á HM.

Þessi mynd af honum hér að ofan hefur svo farið sem eldur í sinu um netheima í dag.