Fengu standandi lófaklapp á frumsýningu Hjartasteins í Feneyjum: Allir krakkaleikarnir viðstaddir

„Þetta er auðvitað alveg einstakt. Við verðum með alla níu aðal krakkaleikarana (13-19 ára) í myndinni viðstadda heimsfrumsýninguna í Feneyjum, á elstu kvikmyndahátíð heims, þar sem íslensk mynd hefur aldrei áður verið í keppni,“ segir Anton Máni Svansson, framleiðandi kvikmyndarinnar Hjartasteins sem var frumsýnd í dag á kvikmyndahátíð í Feneyjum. Anton er staddur út í Feneyjum með íslenska hópnum.

„Þetta gekk bara ótrúlega vel og stóðu áhorfendur upp að sýningunni lokið og klöppuðu vel fyrir myndinni. Síðan fóru leikararnir upp á svið og voru spurð spjörunum úr. Þetta hefði í raun ekki getað farið betur fyrir okkur.“

Um er að ræða fyrstu íslensku kvikmyndina sem keppir til verðlauna á einni allra virtustu og elstu kvikmyndahátíð heims, kvikmyndahátíðinni Venice í Feneyjum, sem er 73 ára í ár og verður haldin frá 31.ágúst – 10.september.

Kvikmyndin er ein af aðeins ellefu völdum myndum í keppnisflokk Venice Days hluta hátíðarinnar en hátt í þúsund myndir hvaðanæva frá heiminum sækja um. Hjartasteinn keppir um þrenn verðlaun í sínum flokki ásamt því að keppa um „Luigi De Laurentiis Award - Lion of the Future,“ 100.000 dollara peningaverðlaun sem allar fyrstu myndir leikstjóra keppa um þvert yfir alla flokka Feneyja hátíðarinnar.

Um fjörutíu manns voru viðstaddir frumsýninguna frá Íslandi og er stemningin í hópnum góð.

Kvikmyndin er fyrsta mynd Guðmundar Arnar Guðmundssonar í fullri lengd, en hann hefur áður gert stuttmyndir sem hafa ferðast um yfir 200 hátíðir víðsvegar um heiminn og unnið til yfir 50 alþjóðlegra verðlauna, ber þar hæst að nefna myndina Hvalfjörður sem vann til verðlauna í aðalkeppninni í kvikmyndahátíðinni í Cannes 2013 og var einnig tilnefnd til Evrópsku Kvikmyndaverðlaunanna.

Hjartasteinn gerist yfir sumar í litlu sjávarþorpi á Íslandi. Þetta er örlagarík þroskasaga sem fjallar um sterka vináttu tveggja drengja sem eru að taka sín fyrstu skref inní unglingsárin og uppgötva ástina.

Tökur fóru fram haustið 2015 í Borgarfirði eystri, Seyðisfirði, Vopnafirði og Dyrhólaey. Með helstu hlutverk fara ungstirnin Baldur Einarsson, Blær Hinriksson, Diljá Valsdóttir, Katla Njálsdóttir, Jónína Þórdís Karlsdóttir, Rán Ragnarsdóttir, Daniel Hans Erlendsson, Theodór Pálsson og Sveinn Sigurbjörnsson ásamt þeim þaulreyndu Nínu Dögg Filippusdóttur, Sveini Ólafi Gunnarssyni, Nönnu Kristínu Magnúsdóttur, Søren Malling og Gunnari Jónssyni. Framleiðendur Hjartasteins eru Anton Máni Svansson og Guðmundur Arnar Guðmundsson fyrir Join Motion Pictures og Lise Orheim Stender og Jesper Morthorst fyrir hið danska framleiðslufyrirtæki SF Studios Production.