„Hvernig geta sumir æst sig svona yfir búvörusamningum?“

Sigmundur Davíð Gunnlaugsson, formaður Framsóknarflokksins og fyrrum forsætisráðherra, furðar sig á hversu margir hafa æst sig yfir búvörusamningum. Hann líkir þeim við kjarasamninga en áður hefur formaður Félags atvinnurekenda sagt þann samanburð „galinn.“

Í færslu sem Sigmundur Davíð birti á Facebook síðu sinni í dag spyr hann „hvernig geta sumir æst sig svona yfir búvörusamningum?“ Hann segir að um neytendastyrki sé að ræða sem skili sér að miklu leyti aftur til ríkisins.

„13 milljarðar á ári í neytendastyrki sem skila sér að miklu leyti aftur til ríkisins, lækka verð innlendrar matvöru, viðhalda undirstöðu byggðar og ferðaþjónustu um allt land, skapa þúsundir starfa, tryggja nýtingu auðlinda og framleiðslu heilnæmra og góðra matvæla og spara 40-50 milljarða af gjaldeyri á hverju ári,“ segir Sigmundur í Facebook færslu sinni.

Sigmundur líkir búvörusamningum við kjarasamninga við aðrar stéttir. „Ekki skammast menn yfir kjarasamningum við aðrar stéttir og þó hafa bændur ekki fengið jafn miklar kjarabætur og aðrar stéttir. Það er helst það sem þarf að bæta.“

Facebook færslu Sigmundar má lesa hér fyrir neðan.

Galinn samanburður

Ólafur Stephensen, formaður Félags atvinnurekenda, sagði í Bítinu á Bylgjunni í júlí að galið væri að líkja búvörusamningum við kjarsamninga. Þar mættust hann og Sindri Sigurgeirsson, formaður Bændasamtakanna, sem sagði að hafa yrði í huga að um samninga milli bænda og ríkis væri að ræða.

„Ríkið er náttúrulega fulltrúi almennings í þessum samningaviðræðum. Á fulltrúi bænda til dæmis að sitja við samningaborðið þegar verið er að semja við opinbera starfsmenn?“ spurði Sindri og Ólafur benti þá á að samanburðurinn stæðist ekki.

„Þetta eru ekki kjarasamningar. Bændur eru sjálfstæðir atvinnurekendur og margir hverjir með fólk í vinnu. Það njóta nú engar aðrar atvinnugreinar þeirra forréttinda að ríkið semji sérstaklega við þær um þeirra starfskjör. Þeir sem eru til dæmis í mínu félagi fara bara að lögum sem Alþingi setur. Alþingi þarf ekki frekar en það vill að semja við bændur um þeirra starfsumhverfi. Það getur einfaldlega bara sett lög um þau þannig að það að bera þetta saman við kjarasamninga og segja þá að bændur ættu að sitja við samningaborðið þegar verið er að semja við opinbera starsfmenn, það er algjörlega galið,“ sagði Ólafur.

Ólafur og Sindri voru þó sammála um það að búvörusamningar skipti neytendur máli. 

„Samningarnir ættu að snúa að því að peningarnir sem neytendur leggja í landbúnaðinn ýmist beint með beinum ríkisstyrkjum eða óbeint í formi tollaverndar nýtist með sem skilvirkustum hætti og það er það sem er ekki að gerast,“ sagði Ólafur.

Viðtalið við Ólaf Stephensen og Sindra Sigurgeirsson má heyra í heild sinni í spilaranum hér fyrir neðan.