Noregur enn án stiga | Rúmenía og Svartfjallaland með sýningu | Sjáðu mörkin

Noregur tapaði 1-0 á útivelli fyrir Azerbaijan í undankeppni Heimsmeistarakeppninnar í fótbolta í Rússlandi 2018.

Maksim Medvedev skoraði sigurmarkið á 11. mínútu og stóðust heimamenn allar atlögur Noregs að því að jafna leikinn.

Liðin eru í C-riðli og er Noregur enn án stiga en liðið náði ekki að skora í tveimur fyrstu leikjum sínum. Azerbaijan er aftur á móti með fullt hús stiga eftir tvo leiki.

Tveimur leikjum í E-riðli er lokið og var hvorugur þeirra spennandi. Rúmenía rúllaði yfir Armeníu 5-0. Armeninn Gor Malakyan fékk að líta rauða spjaldið strax á 3. mínútu og nýtti Rúmenía sér liðsmuninn til fullnustu.

Bogdan Stancu skoraði úr vítaspyrnu á 4. mínútu. Sjö mínútum síðar var staðan orðin 3-0 því Adrian Popa og Razvan Marin skoruðu þá með mínútu millibili.

Nicolae Stanciu skoraði fjórða markið á 29. mínútu og var staðan 4-0 í hálfleik.

Alexandru Chipciu skoraði fimmta markið og eina mark seinni hálfleiks á 59. mínútu.

Rúmenía er með fjögur stig eftir tvo leiki en Armenía er án stiga.

Í hinum leikjum vann Svartfjallaland öruggan sigur á Kasakstan 5-0. Zarko Tomaseivc skoraði eina mark fyrri hálfleiks en eftir hálfleikinn opnuðust flóðgáttir að marki Kasakstan.

Nikola Vukcevic skoraði annað mark Svartfjallalands á 59. mínútu. Fimm mínútum síðar skoraði Stevan Jovetic og á 73. mínútu bætti Fatos Beciraj við fjórða markinu. Stefan Savic skoraði fimmta markið tólf mínútum fyrir leikslok.

Svartfjallaland er með fjögur stig eftir leikina tvo og Kasakstan eitt.