Fyrra hótunarbréfið var ekki opnað fyrr en eftir tíu daga

Systurnar Malín Brand og Hlín Einarsdóttir kröfðust átta milljóna króna af hendi Sigmundar Davíðs Gunnlaugssonar, þáverandi forsætisráðherra. Þær sendu tvö bréf þegar þær reyndu að hafa fé af forsætisráðherranum fyrrverandi en annað var sent á heimili Jóhannesar Þórs Skúlasonar, aðstoðarmanns Sigmundar Davíðs, og hitt var stílað á eiginkonu Sigmundar. Þetta kemur fram í ákæru á hendur systrunum sem þeim var birt í vikunni.

Ákæra héraðssaksóknara á hendur systrunum er í tveimur liðum. Þær eru sakaðar um fjárkúgun gegn Helga Jean Claessen, annars vegar, og svo tilraun til fjárkúgunar gegn Sigmundi Davíð Gunnlaugssyni, hins vegar, með því að reyna að hafa fé af honum.

Ákæran var birt á vef Stundarinnar. Þar kemur fram að Hlín skrifaði og Malín prentaði út nafnlaust bréf sem sett var inn um bréfalúguna á heimili Jóhannesar Þórs Skúlasonar, aðstoðarmanns Sigmundar Davíðs, þar sem bréfritari hótaði að upplýsingar er vörðuðu afskipti Sigmundar Davíðs af fjármálum Vefpressunnar yrðu birtar opinberlega ef Sigmundur greiddi ekki sjö og hálfa milljón króna sem yrði sett í tösku og afhent þriðjudaginn 25. maí.

Bréfið var ekki opnað fyrr en nokkru síðar og því var annað bréf sent, nú á heimili Sigmundar Davíðs. Bréfið var stílað var á Önnu Sigurlaugu Pálsdóttur, eiginkonu Sigmundar, og var þess krafist að Sigmundur greiddi átta milljónir króna en bréfinu fylgdu fyrirmæli um afhendingarmáta, GPS-hnit og ljósmyndir af afhendingarstaðnum við Krýsuvíkurveg í Hafnarfirði.



Malín og Hlín voru svo handteknar eftir að þær höfðu sótt pakkningu í tösku sem þær töldu innihalda milljónirnar átta í seðlum frá Sigmundi en pakkningin hafði verið skilin eftir í trékassa, í samræmi við fyrirmæli þeirra. Rúmum mánuði áður en systurnar voru handteknar kröfðu þær Helga Jean Classen um 700.000 krónur. Ef hann ekki greiddi þeim féð, yrði hann kærður til lögreglu fyrir að hafa nauðgað Hlín.

Féð greiddi Helgi í tvennu lagi á skrifstofu Morgunblaðsins við Hádegismóa í Reykjavík og fékk kvittun fyrir. Fénu skiptu systurnar á milli sín samkvæmt ákærunni. Helgi krefst þess að systurnar verði dæmdar til að greiða honum 1.700.000 kr. í skaðabætur.

Við brotunum sem systrunum er gefið að sök liggur allt að sex ára fangelsisvist.