Lewandowski með tvennu er Bayern fór á toppinn

Bayern München komst í kvöld á toppinn í þýsku úrvalsdeildinni í fótbolta eftir 1-3 útisigur á Mainz 05.

Bayern er með 30 stig líkt og Red Bull Leipzig en betri markatölu. Orkudrykkjaliðið getur endurheimt toppsætið fái það stig gegn Schalke 04 á morgun.

Bayern lenti undir strax á 4. mínútu í leiknum í kvöld. Kólumbíumaðurinn Jhon Cordoba kom þá boltanum framhjá Manuel Neuer í marki þýsku meistarana.

Það tók Robert Lewandowski aðeins fjórar mínútur að jafna metin og á 21. mínútu kom Arjen Robben Bayern yfir.

Staðan var 1-2 í hálfleik og allt fram í uppbótartíma þegar Lewandowski skoraði sitt annað mark og gulltryggði sigur Bayern. Lewandowski er kominn með níu mörk í þýsku deildinni í vetur.