Hafa lagt hald á um 200 lítra af nikótínvökva

Tollverðir hafa að undanförnu haldlagt rúmlega 184 lítra af nikótínvökva sem flytja átti inn í landið samkvæmt bráðabirgðatölum Tollstjóra. Flestar komu sendingarnar, fimm talsins, frá Bandaríkjunum en einnig frá Bretlandi og Hong Kong.

Í flestum tilvikum var um hraðsendingar að ræða en einnig fáeinar póstsendingar. Þá voru tvær sendingar sem innihéldu merkimiða á nikótínvökva einnig haldlagðar en slíkt varðar brot á lyfjalögum.

Stærsta nikótínvökvasendingin innihélt rúmlega 81 lítra og var þar um að ræða hraðsendingu frá Bandaríkjunum. Næststærsta sendingin innihélt 48 lítra og barst hún frá Bretlandi.

Tollstjóri hefur kært umrædd mál til lögreglunnar á höfuðborgarsvæðinu að því er segir í tilkynningu frá Tollstjóra.