Kínverjar hvetja Norður Kóreumenn til að hætta öllum eldflaugatilraunum

Kínverjar leggja til að Norður Kóreumenn hætti tafarlaust tilraunum sínum með eldflaugar og kjarnorkuvopn til þess að draga úr þeirri miklu spennu sem nú er á Kóreuskaganum.

Utanríkisráðherra Kína, sem lengi hefur stutt við bakið á Norður Kóreu, segir, að í staðinn ættu Suður Kóreumenn og Bandaríkin að hætta hinum árlegu heræfingum í Suður Kóreu, sem reita norðanmenn svo mikið til reiði.

Tillaga Kínverja kemur örfáum dögum eftir að Norður Kórea skaut fjórum eldflaugum á loft í átt að Japanströndum. Það gerði það að verkum að Bandaríkjamenn hófu að setja upp eldflaugavarnakerfi í Suður Kóreu en kerfið er síðan mikill þyrnir í augum Kínverja sem líta á það sem ógn.