Gunnar fékk fimm milljóna króna bónus fyrir eina bestu frammistöðu kvöldsins

Gunnar Nelson fékk 50.000 dollara bónus (5,4 milljónir króna) frá UFC fyrir frammistöðu sína í bardaganum gegn Alan Jouban í kvöld en hún þótti ein sú besta á bardagakvöldinu í O2-höllinni í London í kvöld.

UFC gaf það út eftir bardagann að Marc Diakiese, Marlon Vera, Gunnar Nelson og Jimi Manuwa fengu allir þennan væna bónus fyrir bestu frammistöðu kvöldsins.

Diakiese barðist á undirkortinu fyrr um kvöldið en hinir þrír voru allir á aðalhlutanum. Að þessu sinni var ekki veittur bónus fyrir besta bardaga kvöldsins heldur var fjölgað bónusum fyrir bestu frammistöðuna.

Gunnar pakkaði Jouban saman í byrjun annarrar lotu með hengingartaki eftir að slá hann hálfa leið í gólfið.