Fjöldi mótmælti fyrirlestri Þórdísar Elvu og Toms Stranger

„Þetta er vettvangur glæps. Það er nauðgari í húsinu,“ hefur Lundúnamiðillinn Metro eftir mótmælandanum Zita Hol­bourne sem stödd var fyrir utan Southbank-ráðstefnuhúsið í Lundúnum í gær til að mótmæla erindi Þórdísar Elvu Þorvaldsdóttur og Toms Stranger. Erindið fjallaði um efni bókar þeirra, Handan fyrirgefningar, sem fjallar um samskipti þeirra í kjölfar þess að Stranger nauðgaði Þórdísi Elvu.

Fyrirlesturinn átti að fara fram á ráðstefnu í Lundúnum um helgina en eftir undirskriftasöfnun og hávær mótmæli var fyrirlesturinn þá tekinn af dagskrá en var fluttur í gær.

Fjöldi annarra mótmælenda var staddur fyrir utan húsið. Í viðtali við Metro sagði Holbourne að Stranger hafi ekki verið refsað. „Hér er verið að gefa honum vettvang og tækifæri til þess að ferðast um heiminn, tjá sig og græða peninga vegna þess að hann nauðgaði konu. Fyrir mér er það óásættanlegt.“

Mótmælendur voru vopnaðir skiltum sem meðal annars stóð á: „Ekkert réttlæti fyrir konur þýðir engan frið fyrir nauðgara.“

Alls voru um fimmtíu mótmælendur á svæðinu. Lögregla greindi frá því að enginn hefði verið handtekinn. Nokkrir mótmælendur ruddust þó á einu sinni inn í húsið en þeim var strax vísað út.

Listrænn stjórnandi ráðstefnuhússins, Jude Kelly, sagði við Metro að eftir vandlega íhugun um mikilvægi umræðunnar fyrir almenning og frekari samtöl við þolendur kynferðisofbeldis, stuðningshópa og almenna borgara hafi hún tekið þá ákvörðun að færa fyrirlesturinn fram til dagsins í gær.

Sjálf varð Þórdís Elva ekki vör við mótmælin. „Búið var að vísa þeim fáu einstaklingum sem höfðu sig í frammi burt þegar ég og meðhöfundur minn stigum á svið,“ segir hún. Þeir fjögur hundruð áhorfendur sem voru í salnum hafi sýnt þeim ýtrustu virðingu. Að sögn Þórdísar Elvu endurspegla þeir meirihlutann sem þau Stranger upplifa að sé jákvæður í garð framtaksins. Aftur á móti efist minnihlutinn um ágæti þess eða misskilji inntakið.

„Aðrir viðburðir sem við höfum tekið þátt í hafa gengið vonum framar. Til dæmis mættu 1.600 manns til að hlusta á okkur á bókmenntahátíðinni í Adelaide í Ástralíu.“

Þá segist hún trúa staðfastlega á rétt þolenda til að finna sér sína leið til að græða sárin eftir ofbeldi. „Það er ekki til nein rétt eða röng leið til að bregðast við. Saga mín er persónuleg og ekki ætluð sem uppskrift fyrir aðra en ég vona að hún leiði til umræðu þar sem ábyrgðin á ofbeldi er lögð á herðar gerenda í stað þolenda,“ segir Þórdís Elva.

Hún segir ofbeldi þrífast best í leynd og þöggun, andsvarið felist í opinni umræðu. „Að hún skuli reynast sumum erfið og sársaukafull er skiljanlegt en undirstrikar jafnframt hversu mikilvægt það er að halda áfram að rjúfa þögnina og setja ábyrgðina á réttan stað.“ 

Fréttin birtist fyrst í Fréttablaðinu