Líkti mishárri kostnaðarþátttöku karla og kvenna í heilbrigðiskerfinu við bleikan skatt

Hanna Katrín Friðriksson, þingmaður Viðreisnar, spurði Óttarr Proppé, heilbrigðisráðherra, út í misháa kostnaðarþáttöku sjúklinga í heilbrigðisþjónustunni eftir því hvort um væri að ræða þjónustu sem konur þurfa frekar á að halda en karlar.

Meðaltal kostnaðarþátttöku kvenna hefur þannig verið mun hærra en meðaltal kostnaðarþátttöku karla og líkti þingmaðurinn þessu við bleika skattinn sem nokkuð hefur verið til umfjöllunar í fjölmiðlum undanfarin misseri.

Vísaði Hanna Katrín í tölur sem hún hafði skoðað frá árunum 2010 til 2016 sem leiða í ljós að í kvenlægum greinum í heilbrigðisþjónustunni, það er að segja í sérfræðigreinum þar sem konur eru í miklum meirihluta, er greiðsluþáttaka einstaklinga 10 prósent yfir heildarmeðaltali.

Í karllægum greinum er greiðsluþáttaka einstaklinga hins vegar 33 prósent undir meðaltali. Í greinum þar sem er svo ekki marktækur munur á fjölda karla og kvenna sem nota þjónustuna er kostnaðarþáttakan 11,5 prósent yfir meðaltali.

 

„Ég ætla í sjálfu sér ekkert að standa hér og mótmæla því, ef lesa má milli línanna, að karlar séu almennt einfaldari og ódýrari gerð af homo sapiens en konur en mig langar til að spyrja hæstvirtan heilbrigðisráðherra hvort það sé ekki ástæða til þess að fara betur ofan í saumana á þessum málum, kyngreina komugjöld til sérfræðinga og nota tækifærið núna þegar verið er að vinna á breytingum á greiðsluþáttökureglugerðum og koma þessum málum í lag því þetta er ekki í lagi svona.“

Heilbrigðisráðherra tók undir með þingmanninum.

„Ég er sjálfur mikill aðdáandi kynjaðrar hagstjórnar og finnst að kynjagleraugun séu mjög mikilvæg þegar kemur að því að skoða bæði heilbrigðismál en ekki síður fjármál og Excel-inn. Ég verð að viðurkenna það að almennt þegar ég horfi á heilbrigðisþjónustu eða krankleika þá er ég ekki að kyngreina vandræðin en ég veit að vissulega er sum heilbrigðisþjónusta háðari öðru kyninu en hinu. Ég hef ekki annað en orð háttvirts þingmanns fyrir þessum mismun sem mér þykir sláandi og finnst vissulega ástæða til að skoða betur og greina,“ sagði Óttarr.

 

Hanna Katrín þakkaði ráðherranum fyrir svarið og sagði það í anda þess sem hún vonaðist.

„Ég hef fullan skilning á því að þrátt fyrir töluverða umfjöllun í fjölmiðlum á síðasta ári ef ég man rétt um bleikan skatt sem virðist detta á hinar ótrúlegustu vörur svo lengi sem einhverjar líkur eru á því að konur eða stúlkur noti þær umfram karla eða pilta þá þarf töluvert hugmyndaflug til að ímynda sér að bleiki liturinn sé að ryðja sér til rúms í heilbrigðiskerfinu eins og þessar tölur benda til,“ sagði Hanna Katrín.

Óttarr sagði að í nýjum lögum um greiðsluþátttöku sjúklinga væri það alls ekki ætlun löggjafans eða andi laganna að mismuna fólki eftir kyni eða neinu öðru. Þvert á móti væri löggjöfin sett fram til að jafna byrðarnar. Hann fagnaði hins vegar umræðunni og kvaðst hlakka til að halda henni áfram.