Dele Alli dæmdur í þriggja leikja bann

Enski landsliðsmaðurinn Dele Alli hjá Tottenham fékk þriggja leikja bann fyrir rauða spjaldið sem hann fékk á móti Gent 23. febrúar síðastliðinn.

Alli var rekinn af velli í seinni leiknum á móti Gent í 32 liða úrslitum Evrópudeildarinnar.

Þetta þriggja leikja bann þýðir að Tottenham verður án Dele Alli í fyrstu þremur Evrópuleikjum sínum á næsta tímabili sem verða væntanlega í Meistaradeildinni.

Tottenham er eins og er í öðru sæti í ensku úrvalsdeildinni og á mjög góða möguleika á því að tryggja sér sæti í Meistaradeildinni á næstu leiktíð.

Arsenal fékk einnig fimm þúsund evra sekt vegna þess að stuðningsmenn hlupu inn á völlinn í seinni leiknum á móti Bayern München í sextán liða úrslitum Meistaradeildarinnar.

Bayern München fékk aftur á móti þrjú þúsund evra sekt þar sem að stuðningsmenn þýska félagsins voru staðnir af því að henda hlutum inn á völlinn í sama leik.

Dele Alli hefur skorað 17 mörk og gefið 8 stoðsendingar í 39 leikjum í öllum keppnum á tímabilinu en hann heldur upp á 21 árs afmælið sitt í næsta mánuði.