Vinur segir Spánverjann hafa viðurkennt kynferðisbrot

Hæstiréttur hefur staðfest fjögurra vikna gæsluvarðhald yfir spænskum karlmanni sem grunaður er um að hafa nauðgað tveimur konum og káfað á þeirri þriðju eftir árshátíð á hóteli á Suðurlandi í febrúar síðastliðnum.

Lögregla telur sig hafa rökstuddan grun um að maðurinn hafi gerst sekur um brotin, að því er fram kemur í úrskurðinum. Það sé meðal annars eftir að vitni, vinur mannsins, greindi frá því að maðurinn hafi farið inn á herbergi til stelpu á hótelinu sem annað hvort hafi verið sofandi eða áfengisdauð. Maðurinn hafi sagt sér að ljósin í herberginu hafi verið slökkt og að hann hafi farið að eiga við stelpuna í rúminu, vitandi að hún væri sofandi. Hann hafi svo hætt og farið út þegar hún hafi vaknað og kveikt ljósin.

Konurnar þrjár voru sofandi hver í sínu hótelherberginu þegar hin ætluðu brot voru framin. Konurnar sem maðurinn er sakaður um að hafa nauðgað segjast báðar hafa vaknað við að maðurinn væri að hafa við þær samfarir. Tókst þeim báðum að ýta manninum af sér.

Segist hafa verið að leita að tóbakinu sínu

Önnur konan gat bent á manninn á vettvangi og var hann handtekinn á staðnum, en við leit fundust kvenmannsnærbuxur í vinstri brjóstvasa mannsins. Þriðja konan hafði samband við lögreglu nokkrum dögum síðar og kærði manninn fyrir kynferðisbrot, en hún sagði hann hafa káfað á innanverðu læri sínu og rassi þegar hún lá uppi í rúmi.

Maðurinn neitar sök og segir kynferðismökin hafa verið með samþykki kvennanna, og að hann hafi síðan látið af háttsemi sinni þegar þær hafi beðið hann um að hætta. Hvað varðar þriðju konuna segist hann hafa verið með hendurnar undir sæng hennar því hann hafi verið að leita að tóbakinu sínu í rúmi hennar.

Talinn hættulegur umhverfi sínu

Maðurinn var úrskurðaður í varðhald á grundvelli almannahagsmuna en lögregla telur hann hættulegan umhverfi sínu og brotin þess eðlis að það stríði gegn réttarvitund almennings að hann gangi laus á meðan málið sé til meðferðar. Þá telur lögregla að sterkur rökstuddur grunur sé fyrir því að maðurinn hafi gerst sekur um brotin, þrátt fyrir neitun hans.

Þá telur lögregla að grunur sinn hafi styrkst á undanförnum vikum því fram hafi farið frekari yfirheyrslur vitna sem hafi meðal annars leitt í ljós að þær skýringar sem maðurinn gaf í framburðum sínum hjá lögreglu fái ekki staðist.

Lögregla segir rannsókn málsins á lokastigi. Niðurstaðna úr DNA rannsókn er nú beðið en gert er ráð fyrir að þær berist á næstu fjórum til fimm vikum. Að öðru leyti sé rannsókn málsins lokið og að það verði sent héraðssaksóknara eins fljótt og unnt verði.