Lewandowski kom að fimm mörkum gegn Alfreð og félögum

Alfreð Finnbogason sat allan tímann á varamannabekknum þegar Augsburg steinlá fyrir Bayern München á útivelli. Lokatölur 6-0, Bayern í vil.

Robert Lewandowski var magnaður í leiknum en hann skoraði þrennu og gaf tvær stoðsendingar. Thomas Müller skoraði tvívegis og Thiago komst einnig á blað.

Bayern er áfram með 13 stiga forskot á toppi deildarinnar. Augsburg er í sextánda og þriðja neðsta sætinu.

Werder Bremen vann sinn fjórða sigur í síðustu fimm leikjum þegar liðið lagði Freiburg að velli, 2-5. Aron Jóhannsson sat allan tímann á varamannabekknum hjá Bremen.

Schalke og Borussia Dortmund gerðu 1-1 jafntefli í grannaslag. Pierre-Emerick Aubameyang kom Dortmund yfir á 53. mínútu en Thilo Kehrer jafnaði metin 13 mínútum fyrir leikslok.

Þá rúllaði RB Leipzig yfir Darmstadt, 4-0, og Hamburg vann 2-1 sigur á Köln.

Úrslitin í dag:

Bayern München 6-0 Augsburg

Schalke 1-1 Dortmund

Freiburg 2-5 Werder Bremen

RB Leipzig 4-0 Darmstadt

Hamburg 2-1 Köln