Johnson gantaðist með kynferðisbrotin á leynilegri upptöku

Fangelsismálayfirvöld í Bretlandi rannsaka nú myndband þar sem sjá má enska knattspyrnumanninn Adam Johnson gantast með fangelsisdóm sem hann fékk fyrir kynferðisbrot gegn fimmtán ára stúlku. The Guardian greinir frá.

Myndbandið var tekið upp á leynilegan hátt og virðist Johnson ekki gera sér grein fyrir því að verið sé að taka samtal hans við meðfanga sín upp. Breska dagblaðið The Sun birti myndbandið á vefsíðu sinni í gær.

Heyra má hvernig Johnson gerir lítið úr broti sínu og segir hann meðal annars að ef hann hefði ekki verið þekktur knattspyrnumaður hefði hann líklegast sloppið með aðvörun

Johnson, sem lék meðal annars með Sunderland og Manchester City í ensku úrvalsdeildinni var dæmdur í sex ára fangelsi á síðasta ári.

Einnig má heyra samfanga Johnson spyrja hvort hann hefði naugðað stúlkunni en neitaði hann því.

„Nei, en ég vildi að ég hefði gert það fyrir sex ár,“ svaraði Johnson og vísaði þar í lengd fangelsisdómsins. Johnson hefur reynt án árangurs að fá fangelsisdómi sínum aflétt, nú síðast í síðasta mánuði.