Braust inn í níu bíla

Karlmaður var handtekinn í Garðabæ í nótt grunaður um innbrot og þjófnað úr allt að níu bílum. Hann var vistaður í fangaklefa í nótt vegna málsins, að því er segir í skeyti frá lögreglu.

Þá voru tveir handteknir, ökumaður og farþegi, á stolinni bifreið í nótt. Báðir aðilar reyndust undir áhrifum fíkniefna auk þess sem fíkniefni fundust í bílnum.

Einn til viðbótar var handtekinn vegna þjófnaðar, en hann hafði stolið úr verslun. Ekki kemur fram í tilkynningu lögreglu hvaða verslun um ræðir né hvar hún er á höfuðborgarsvæðinu. Maðurinn var undir áhrifum vímuefna og gisti fangageymslur í nótt.