Merkel hvetur Pútín til að stöðva ofsóknir gegn samkynhneigðum

Angela Merkel, kanslari Þýskalands, hvatti Vladimír Pútín, Rússlandsforseta, til þess að stöðva ofsóknir gegn samkyhneigðum þar í landi, á sameiginlegum blaðamannafundi þeirra í dag.

Merkel kom í opinbera heimsókn til Rússlands í dag, til þess að ræða meðal annars stöðuna í Sýrlandi og Úkraínu. Þá voru einnig rædd mannréttindamál í Rússlandi og staða samkynhneigðra, sem þurft hafa að þola ofsóknir þar í landi.

Ég ítrekaði hversu mikilvægt er að mega mótmæla í siðuðu samfélagi. Ég minntist einnig á þær neikvæðu fréttir sem við heyrum um meðferð samkynheiðgra í Tjétjéníu og bað Pútín um að tryggja rétt þessara minnihlutahópa.

Pútín var spurður út í ásakanir um að rússneskir tölvuhakkarar á vegum stjórnvalda í Moskvu, hafi reynt að hafa áhrif á bandarísku forsetakosningarnar í fyrra. Pútín vísaði því á bug og sagði að Rússar væru ekki að reyna að skipta sér af kosningum í öðrum löndum.

Þú talar um bandaríska málið sem enginn hefur staðfest. Þetta eru bara sögusagnir sem eru notaðar í stjórnmálabaráttunni í Bandaríkjunum.