Stefnir í þriggja vikna einangrun í smyglmáli

Kolbeinn Tumi Daðason skrifar 16. maí 2017 09:00

Tveir erlendir karlmenn hafa verið í einangrun í fangelsinu á Hólmsheiði í átján daga en þeir eru grunaðir um smygl á talsverðu magni af sterkum fíkniefnum til landsins með Norrænu í lok apríl.

Fíkniefnin voru falin í bíl sem annar mannanna kom með til landsins með Norrænu þriðjudagskvöldið 25. apríl. Handtökurnar áttu sér þó ekki stað fyrr en tveimur dögum síðar á höfuðborgarsvæðinu, þangað sem ekið var frá Seyðisfirði.

Grímur Grímsson fór fyrir rannsókn málsins.vísir/anton brink

Magn og tegund ekki uppgefin

Mennirnir voru úrskurðaðir í gæsluvarðhald á grundvelli rannsóknarhagsmuna föstudaginn 28. apríl. Það var svo framlengt miðvikudaginn 12. maí í níu daga eða til föstudagsins 19. maí. Annar kærði úrskurðinn til Hæstaréttar sem staðfesti úrskurðinn.

Grímur Grímsson, yfirlögregluþjónn hjá lögreglunni á höfuðborgarsvæðinu sem stýrir rannsókn málsins, segir í samtali við Vísi að rannsókninni miði ágætlega. Hann segir ekki fleiri hafa verið handtekna í tengslum við málið. Hvorki fæst uppgefið hvaða efni ræðir eða magn þeirra.

Athygli vekur hve lengi mennirnir hafa verið í einangrun í fangelsinu á Hólmsheiði eða átján daga. Þeir verða orðnir 22 þegar gæsluvarðhaldið rennur út á föstudaginn.

Einangrun regla frekar en undantekning

Einangrunarvist gæsluvarðhaldsfanga er meginregla á Íslandi. Það var niðurstaðan í meistararitgerð Elísabetar Ingólfsdóttur í lögfræði við Háskóla Íslands árið 2015. Mun algengara er að fangar séu settir í einangrun hér á landi en í Danmörku og Noregi, en líkist meira Svíþjóð. Hins vegar hafa sænsk yfirvöld verið harðlega gagnrýnd fyrir brot á réttindum gæsluvarðhaldsfanga svo þá samanburður er mögulega ekki heppilegur.

Kastljós fjallaði um málið á dögunum og rifjaði upp mál Guðmundar Gunnlaugssonar sem sat saklaus í einangrun í ellefu sólarhringa í fangaklefa við Hverfisgötu árið 2011. Hann fékk aldrei að vita nákvæmlega hvers vegna hann var handtekinn og fékk ekki læknisaðstoð.

Hæstiréttur dæmdi Guðmundi tvær milljónir króna í miskabætur en íslenska ríkið var dæmt fyrir að brjóta gegn ákvæðum stjórnarskrár sem banna hvers kyns pyntingar og niðurlægjandi meðferð borgaranna.

Birtist í Fréttablaðinu