Svona lítur neyðarvegabréfið út

Upplýsingar í íslenska neyðarvegabréfið eru handskrifaðar og passamynd af viðkomandi hengd inn í bókina, en að öðru leyti er það svipað og almenn vegabréf. Þjóðskrá hefur fengið nokkrar fyrirspurnir vegna málsins og sendi því meðfylgjandi myndir fólki til upplýsinga.

Greint var frá því í dag að næstu vikur verði aðeins hægt að fá svokölluð neyðarvegabréf. Þjóðskrá Íslands átti von á að fá þrjátíu þúsund vegabréfabækur frá framleiðanda þeirra í Kanada í byrjun þessa mánaðar en vegna bruna í prentsmiðjunni á síðasta ári hafa orðið tafir á afhendingu bréfanna.

Margrét Hauksdóttir, forstjóri Þjóðskrár, sagði í samtali við fréttastofu í dag að enginn þurfi að óttast að fá ekki vegabréf í tíma þótt sumir verði að láta sér neyðarvegabréfin duga. Þau séu talin fullgild ferðaskilríki í Evrópu en ekki nægilega örugg utan álfunnar og þá sérstaklega í Bandaríkjunum.

Á meðan þetta ástand varir þurfa umsækjendur um vegabréf að fylla út eyðublað á vef Þjóðskrár, Skrá.is, þar sem brottfarardagur þeirra er skráður og verður útgáfu almennra vegabréfa og eftir atvikum neyðarvegabréfa forgangsraðað miðað við hvað skammt er til brottfarar.