Malín áfrýjar til Hæstaréttar

Malín Brand hefur áfrýjað fangelsisdómi sem hún hlaut fyrir fjárkúgun til Hæstaréttar. Malín fékk tólf mánaða fangelsisdóm, þar af níu mánuði skilorðsbundna til tveggja ára, eins og systir hennar, Hlín Einarsdóttir.

Dómurinn var fyrir tvö brot. Annars vegar fyrir að hafa gert tilraun til að kúga fé út úr Sigmundi Davíð Gunnlaugssyni, þáverandi forsætisráðherra, og hins vegar fyrir fullframda fjárkúgun gegn Helga Jean Classen. Systurnar kúguðu 700 þúsund krónur út úr honum með því að hóta að kæra hann fyrir nauðgun.

Dómur var kveðinn upp í málinu þann 7. apríl. Þinghald var lokað en við þingfestingu játaði Hlín tilraun til fjárkúgunar í tilfelli Sigmundar Davíðs og Malín viðurkenndi hlutdeild en neitaði samverknaði. Þær neituðu báðar sök í hinum þætti málsins.

Dómurinn vonbrigði

Málið er nú komið á lista Hæstaréttar yfir áfrýjuð mál og þess beðið að málið verði sett á dagskrá. Ólílegt má telja að það verði fyrr en með haustinu.

„Mín fyrstu viðbrögð eru þau að mér finnst dómurinn of þungur. Ég get ekkert leynt því og þetta eru mikil vonbrigði en ég er ekki búinn að kynna mér dóminn til hlítar svo að á næstu dögum þá munum við ákveða framhaldið,“ segir Hólmgeir Elías Flosason, verjandi Malínar, í samtali við Vísi daginn sem dómur féll. Nú hefur sem sagt verið ákveðið að áfrýja dómnum.

„Mín skoðun er sú að hlutverk Malínar hafi verið miklu minna heldur en Hlínar, það er engum blöðum um það að fletta, en ég vil samt ekkert vera að segja hvernig ég hefði viljað sjá dæmt í málinu. En mér finnst kannski ekki nægilega greint á milli, það er að segja mér finnst verknaður þeirra beggja ekki kalla á sömu refsingu yfir þeim báðum,“ segir Hólmgeir.