Dýrt húðflúr: Missir af bikarúrslitaleik og samningnum rift

Ferð úrúgvæska varnarmannsins Guillermo Varela til húðflúrara á mánudaginn reyndist honum dýrkeypt.

Varela, sem er 24 ára, var lánaður frá Manchester United til Eintracht Frankfurt fyrir tímabilið. Varela hefur leikið 10 leiki fyrir Frankfurt í vetur en nú er ljóst að þeir verða ekki fleiri.

Varela fékk sér húðflúr á mánudaginn. Það tókst ekki betur en svo að Úrúgvæinn fékk sýkingu og missir þ.a.l. af bikarúrslitaleik Frankfurt og Borussia Dortmund á laugardaginn.

Forráðamenn Frankfurt höfðu afskaplega lítinn húmor fyrir þessu uppátæki Varelas og riftu lánssamningi hans.

Varela óhlýðnaðist skipunum knattspyrnustjórans Niko Kovac og læknateymi Frankfurt en leikmönnum var bannað að fá sér húðflúr fyrir leikinn mikilvæga á laugardaginn.