Juventus ítalskur meistari sjötta árið í röð

Juventus tryggði sér ítalska meistaratitilinn með 3-0 sigri á Crotone á heimavelli í dag en Juventus er því ítalskur meistari sjötta árið í röð þrátt fyrir að ein umferð sé eftir.

Roma átti enn möguleika á að ná Juventus að stigum fyrir leikinn í dag eftir 3-1 sigur þegar liðin mættust fyrir viku síðan en Crotone sem er í harðri fallbaráttu var lítil fyrirstaða fyrir meistaranna.

Króatíski framherjinn Mario Mandzukic kom Juventus yfir á 12. mínútu eftir undirbúning Juan Cuadrado en Pablo Dybala bætti við öðru marki stuttu fyrir lok fyrri hálfleiks og var staðan því 2-0 í hálfleik.

Crotone ógnaði aldrei forskoti Juventus í seinni hálfleik en bakvörðurinn Alex Sandro innsiglaði sigur Juventus á 83. mínútu og um leið ítalska meistaratitilinn.

Juventus vinnur því tvöfalt heimafyrir eftir sigur gegn Lazio í bikarúrslitunum fyrr í vikunni en þeir geta hvílt leikmenn gegn Bologna um næstu helgi fyrir úrslitaleik Meistaradeildar Evrópu gegn Real Madrid 3. júní næstkomandi.

Emil Hallfreðsson lék 90 mínútur í 1-1 jafntefli Udinese á heimavelli gegn Sampdoria en þetta var síðasti heimaleikur Udinese á tímabilinu.

Heimamenn luku leik með aðeins níu leikmenn eftir tvö rauð spjöld í upphafi seinni hálfleiks en tíu leikmenn Sampdoria náðu ekki að nýta sér það.

Þá vann AC Milan 3-0 sigur á heimavelli gegn Bologna en öll þrjú mörk leiksins komu í seinni hálfleik. Með þessum sigri tryggði AC Milan sér þátttökurétt í undankeppni Evrópudeildarinnar á næsta tímabili.

Úrslit dagsins:

AC Milan 3-0 Bologna

Empoli 0-1 Atalanta

Genoa 2-1 Torino

Juevntus 3-0 Crotone

Sassuolo 6-2 Cagliari

Udinese 1-1 Sampdoria