Kimmich kom í veg fyrir að heimsmeistararnir töpuðu

Danmörk og Þýskaland gerðu 1-1 jafntefli í vináttulandsleik á heimavelli Bröndby í kvöld.

Bæði lið eru að undirbúa sig fyrir næsta leik í undankeppni HM 2018 og þá eru Þjóðverjar á leið í Álfukeppnina í Rússlandi síðar í þessum mánuði.

Þjóðverjar tefldu fram reynslulitli liði í kvöld en margir af lykilmönnum heimsmeistaranna fengu frí.

Christian Eriksen, leikmaður Tottenham, kom Dönum yfir á 18. mínútu og þannig var staðan allt þar til tvær mínútu voru til leiksloka.

Þá jafnaði Joshua Kimmich, leikmaður Bayern München, metin með glæsilegri klippu.

Fleiri urðu mörkin ekki og liðin sættust á skiptan hlut.