Salur forseta, drottninga og dansóðra Íslendinga endurnýjaður

Einn elsti og þekktasti veitingasalur landsins gengur nú í gegnum endurnýjun lífdaga og hefur nánast allt verið rifið innan úr honum. Þar hafa fjölmargir þjóðhöfðingjar komið til veislu, pólitísk örlög hafa ráðist þar og kynslóðum saman hafa Íslendingar stigið þar dans fram á rauða nótt. Stöð 2 rifjaði upp sögu salsins, líkt og sjá má í sjónvarpsfréttinni neðst í þessari frétt.

Hótel Saga er fimmtíu og fimm ára um þessar mundir. En hótelið hóf starfsemi á þjóðhátíðardegi Frakka, Bastilludeginum, hinn 14. júlí árið 1962. Eins og sjá má standa yfir miklar framkvæmdir á frægasta veitingasal landsins, Súlnasalnum, sem fær nú andlitslyftingu.

Saga Hótel Sögu og þar með Súlnasalarins er samofin sögu þjóðarinnar í rúma hálfa öld. Fyrir tónlistarfólk má geta þess að þar gistu meðlimir Led Zeppilin árið 1970 og það gerði jazzsöngkonan Ella Fitzgerald líka.

Fyrir utan alla dansleikina hafa menn og konur mætt pólitískum örlögum sínum í Súlnasalnum. Þar viðurkenndi Árni Sigfússon sig og Sjálfstæðisflokkinn sigraðan þegar Reykjavíkurlistinn vann borgina í fyrsta sinn í maí 1994 og þar fór einnig fram frægur landsfundur Samfylkingarinnar þegar Árni Páll Árnason vann formannsembættið í kappi við Sigríði Ingibjörgu Ingadóttur með aðeins eins atkvæðis mun árið 2015.

Ingibjörg Ólafsdóttir hótelstjóri segir salinn verða tilbúinn fyrir jól.

„Og nú erum við að breyta honum og eins og þú sérð kannski aðeins meira en að breyta honum. Við erum að endurnýja hann. En við erum að passa okkur ofboðslega vel á því  að þessi sérkenni sem hafa einkennt salinn frá upphafi fái að halda sér og að stemmingin verði alltaf sú sama,“ segir Ingibjörg.

Vigdís forseti í sérlegu uppáhaldi

Nú má til dæmis sjá upp í hringlaga loft yfir gamla dansgólfinu þar sem eru gluggar sem áður voru skyggðir og ekki sást heldur í fyrir stórri ljóskrónu. Salurinn verður færður nær uppruna sínum eins og arkitektinn Halldór Jónsson hannaði hann og þegar framkvæmdum lýkur rétt fyrir jól lofar hótelstjórinn áframhaldandi gleði í Súlnasal.

„Við erum búin að taka niður gamla sviðið sem var hérna. En við ætlum að setja annað svið og það verður áfram upphækkun á dansgólfinu og það verður tjúttað hér upp um alla veggi,“ segir hótelstýran glöð í bragði.

Fjölmörgum þjóðhöfðingjum hefur verið haldin veisla í Súlnasal þar sem mikið var um að vera sumarið 1990. Hinn 26. júní það ár hélt Vigdís Finnbogadóttir engri annarri en Elísabetu annarri Englandsdrottningu veislu í salnum en hún var fyrsta drottning eða konungur Bretlands sem kom til Íslands. Í lok ágúst sama ár kom Francois Mitterrand Frakklandsforseti síðan í heimsókn og var haldin veisla í Súlnasalnum. En frægt er að Vigdís og hann héldu síðan þaðan á rokktónleika með Sykurmolunum í Duus Húsi.

„Og við viljum einmitt gjarnan koma tölu á það sem hefur verið hérna. Og Vigdís var alveg sérlega elskuleg að halda veislurnar sínar hér hjá okkur. Okkur þykir alveg ofboðslega vænt um hana. Auðvitað hina líka en ofsalega vænt um Vigdísi,“ segir Ingibjörg Ólafsdóttir.