Vilhjálmur Alvar dæmir úrslitaleikinn

Vilhjálmur Alvar Þórarinsson mun dæma úrslitaleik FH og ÍBV í Borgunarbikar karla á laugardag. Alls verða sex dómarar við störf á leiknum.

Greint var frá þessu á blaðamannafundi fyrr í dag en Vilhjálmur Alvar dæmir þá sinn fyrsta bikarúrslitaleik á ferlinum. Hann hefur staðið sig vel í Pepsi-deildinni í sumar.

Jóhann Gunnar Guðmundsson og Oddur Helgi Guðmundsson verða aðstoðardómarar í leiknum og Frosti Viðar Gunnarsson fjórði dómari.

En það verða einnig endalínudómarar í leiknum og kemur það í hlut Þorvaldar Árnasonar og Gunnars Jarls Jónssonar að gegna því hlutverki á laugardag.

Leikurinn fer fram klukkan 14.00 og verður í beinni útsendingu. Upphitun fyrir leikinn hefst á Stöð 2 Sport klukkan 13.30.