Ekkert fékkst upp í kröfur í 1,7 milljarða gjaldþroti skórisa

Engar eignir fundust í þrotabúum Spors ehf. og Sporbaugs ehf. Einkahlutafélögin ráku heildsöluverslun og verslanir með skófatnað. Lýstar kröfur í búin námu samtals 1,7 milljarði króna.

Átta eru frá því að félögin voru tekin til gjaldþrotaskipta en meðal verslana sem einkahlutafélögin ráku voru skóverslanir Steinar Waage, skór.is og Ecco. Í Lögbirtingarblaðinu kemur fram að lýstar kröfur í þrotabú Spors hafi numið um 840 milljónum króna en lýstar kröfur í þrotabú Sporbaugs numið um 926 milljónum króna. Skiptum lauk án þess að nokkuð fengist upp í kröfurnar.

Félögin voru sett í þrot af Sparisjóðabankanum vegna gengislána. Stefán Bragi Bjarnason, fyrrverandi stjórnarformaður félaganna tveggja, sagði á sínum tíma að skilanefnd Sparisjóðabankans hafa farið fram með offorsi og sakaðu hann skilanefndina um að hafa beitt klíkuskap við yfirtöku á félögum.

Félagið S4S keypti skóverslanirnar Steinar Waage, skór.is og Ecco út úr Sporbaugi árið 2009. Eftir það sat um fimmhundrað milljóna króna skuld við Sparisjóðabanka Íslands sem tók félögin yfir en forsvarsmenn félaganna tveggja voru ósátt við þessa ráðstöfun bankans.

S4S er nú meðal annars í eigu Bjarna Ármannssonar fjárfestis en hann keypti sig inn í félagið snemma á árinu.