Heimir: Þurfum jafnvel að taka áhættur gegn Úkraínu

Hann segir að Viðar Örn hafi verið kallaður inn í hópinn því að leikurinn sé þess eðlis að Ísland þurfi að skora mörk og sækja sigur.

„Sigur gerir það að verkum að við verðum enn með örlögin í okkar höndum. Þannig erum við að hugsa um þennan leik,“ sagði Heimir en blaðamannafundinn má sjá í heild sinni hér fyrir ofan.

„Þetta er úrslitaleikur fyrir okkur. Annars eru allir heilir og allir frískir. Það eru engin meiðsli í hópnum,“ sagði Heimir enn fremur.

Sjá einnig: Svona var blaðamannafundur Heimis og Arons Einars

Þjálfarinn var enn fremur spurður um Viðar Örn og ítrekaði hann að liðið þyrfti á leikmanni eins og honum að halda í þetta verkefni.

„Við þurfum að vinna leikinn og jafnvel taka áhættur í honum. Hann er leikmaður sem getur skorað mörk og þess vegna tökum við hann inn. Þess eðlis er leikurinn,“ sagði hann.

Heimir sagði enn fremur að möguleiki væri á því að hann breyti byrjunarliði sínu og mögulega leikaðferð, en að það verði ekki gefið út fyrir leik eins og vaninn er.