Vettel: Ég veit ekki hvað klikkaði hjá okkur í dag

Lewis Hamilton náði sínum 69. ráspól á Formúlu1 ferlinum í dag í erfiðum aðstæðum á Monza brautinni á Ítalíu. Hver sagði hvað eftir tímatökuna?

„Ég er mjög spenntur yfir þessum hring. Ég elska ítalska aðdáendur, þó þeir séu flestir á bak við Ferrari. Það verður víst þurrt á morgun og það verður vonandi fallegur ítalskur dagur. Ég trúi því ekki að ég hafi náð ráspól númer 69,“ sagði Hamilton.

„Þetta var flókin tímataka og erfitt að reikna út aðstæður. Það var erfitt að halda dekkjunum köldum. Í lokaatlögu minni gekk allt upp og ég er ánægður með annað sæti,“ sagði Max Verstappen sem átti annan besta tíma dagsins en þarf að sæta refsingu vegna nýrra vélaríhluta og verður því aftar á ráslínu þegar ræst verður á morgun. Verstappen ræsir 14. á morgun að öllu óbreyttu.

„Þetta var gaman, í fyrstu og annarri lotu voru aðstæður erfiðar. Í þriðju lotunni var ég búinn að ná taktinum á dekkjunum og við gátum sett kraft í þetta. Það er frábært að við náðum að klára tímatökuna fyrir þá áhorfendur sem eru hér,“ sagði Daniel Ricciardo sem varð þriðji í dag en þarf að sætta sig við að færast aftar sökum nýrra vélaríhluta í bíl hans. Ricciardo ræsir 17. á morgun að öllu óbreyttu.

„Ég veit ekki hvað klikkaði hjá okkur í dag. Það var mikilvægt að standa sig í dag en okkur tókst það ekki. Við erum með góðan bíl og það er hægt að taka fram úr svo keppnina á morgun verður skemmtileg,“ sagði Sebastian Vettel sem ræsir sjötti á morgun.

„Við vorum ekki nógu fljótir í dag. Við gátum ekki látið dekkin virka eins vel og aðrir í dag. Þetta eru langt frá því bestu aðstæður að ræsa svona aftarlega en vonandi veðrum við betri í þurru á morgun.,“ sagði Kimi Raikkonen sem ræsir fimmti á morgun.

„Við vissum að í dag væri tækifæri til að slá í gegn. Ég ólst upp við að keppa í rigningu og það er gaman að sjá það skila sér í Formúlu 1 bílnum. Það er eitt markmið á mortun, það er að landa verðlaunasæti,“ sagði Esteban Ocon sem mun ræsa þriðji á morgun á Force India bílnum.

„Bíllinn var góður í dag og ég skemmti mér vel. Ég hef aldrei ekið Formúlu 1 bíl í rigningu áður. Ég er stoltur af þessum hring og ég veit að liðið þurfti á þessu að halda,“ sagði Lance Stroll sem ræsir annar á Williams bílnum á morgun. Hann er sá yngsti frá upphafi til að ræsa af fremstu rásröð.