Björn Leó nýtt leikskáld Borgarleikhússins

Björn Leó Brynjarsson hefur verið valinn nýtt leikskáld Borgarleikhússins fyrir leikárið 2017 til 2018. Tilkynnt var um valið við athöfn í Borgarleikhúsinu í dag að því er segir í fréttatilkynningu frá leikhúsinu.

Björn Leó tekur við af Sölku Guðmundsdóttur en meðal fyrri leikskálda hússins hafa verið Tyrfingur Tyrfingsson, Auður Jónsdóttir, Jón Gnarr og Kristín Marja Baldursdóttir. Björn Leó mun vinna að nýju leikriti sem stefnt er að því að setja upp í Borgarleikhúsinu leikárið 2018 til 2019.

Leikritunarsjóður Leikfélags Reykjavíkur undir forystu Vigdísar Finnbogadóttur velur leikskáld Borgarleikhússins. Um fyrri störf Björns Leós segir í tilkynningu:

Björn Leó Brynjarsson er fæddur árið 1985. Hann lauk stúdentsprófi frá Menntaskólanum í Reykjavík 2005 og B.A. prófi í Fræðum og framkvæmd úr leiklistardeild Listaháskóla Íslands árið 2011. Hann hefur m.a. starfað sem texta- og hugmyndasmiður hjá auglýsingastofunni Pipar, skrifað pistla fyrir Víðsjá og verið stuðningsfulltrúi á bráðageðdeild 32C, Landspítala.

Björn Leó var meðlimur í stjórn Stúdentaleikhússins, stofnmeðlimur „action-leikhús-hópsins“ Cobra Kai, þá hefur hann skrifað og leikstýrt m.a. verkinu Tranturinn og hnefinn auk þess að vera meðhöfundur og aðstoðarleikstjóri verksins Petra í uppsetningu Dansaðu fyrir mig sem sýnt var á Lókal 2014 og leiklistarhátíðinni í Tampere 2015. Hann skrifaði og leikstýrði verkinu Frami árið 2015 sem sýnt var í Tjarnarbíó og vakti mikla athygli áhorfenda og gagnrýnenda.