Sjón og Jón koma til álita sem verðandi Nóbelsskáld

Sjón og Jón Kalmann hafa gert sig gildandi á lista yfir þá sem teljast koma til greina sem næstu handhafar Nóbelsverðlauna í bókmenntum. Verðlaunin verða afhent á morgun en eins og áhugafólk um Nóbelsverðlaunin þekkja hlaut Bob Dylan Nóbelsverðlaunin í fyrra.

Sjón og Jón eru á listum veðbanka, báðir samanlagt með stuðulinn 21, sem þýðir einfaldlega að ef einhver vill veðja þúsund krónum á að þeir hreppi hnossið, þá fær sá 21 þúsund krónur til baka. En, tapar þúsund kallinum komi það ekki á daginn.

Heimsþekktir höfundar neðar á lista

Þeir höfundar sem þykja líklegastir samkvæmt veðbönkum eru Ngũgĩ wa Thiong'o frá Kenía, hann er efstur á blaði. Næstur kemur japanski rithöfundurinn Haruki Murakami, sem oftlega hefur verið nefndur sem kandítat þegar Nóbelsverðlaunin eru annars vegar. Og þriðja efst á lista er svo Margret Atwood, kandadíski rithöfundurinn, þekktur femínisti og margverðlaunuð fyrir skrif sín.

Jón og Sjón eru í tíunda sæti og merkilegt má heita að þeir teljast líklegri til að hreppa verðlaunin en stór nöfn á borð við Philip Roth, Peter Handke og Houellebecq svo einhverjir séu nefndir til sögunnar.

Þetta hefur vakið athygli, meðal annars hefur Sænska sjónvarpið fjallað um þetta og ræddi við Jón Kalmann. Jón er hress og segist ætla, verði hann fyrir valinu, að drekka viskíflösku með vinum sínum. Til að fagna. Hann segir þetta heiður en ljóst er að hann vill ekki gera of mikið úr þessu. Og Jón Kalmann segist ekki hafa heyrt neitt frá akademíunni.

Báðir vakið athygli á erlendri grundu

Vísir reyndi að komast til botns í því, með fullri virðingu, hvað ræður því að þeir Jón og Sjón en ekki einhverjir aðrir, til að mynda Guðbergur Bergsson, eru ekki nefndir til sögunnar. Og hvort komið sé að Íslandi í einhverjum pólitískum skilningi sem undirliggjandi getur verið? Eru menn misverðlaunalegir á svipinn?

Egill Örn Jóhannsson, formaður Félags íslenskra bókaútgefenda, segist ekki þekkja pólitíkina í kringum Nóbelinn og minnir á að hún hafi vitaskuld verið umdeild frá upphafi. Egill Örn minnir á að Dylan hafi fengið verðlaunin síðast og kom það mörgum í opna skjöldu.

„Sjón hefur auðvitað vakið heilmikla athygli erlendis fyrir bækurnar sínar og eins hefur hann staðið framarlega þegar kemur að ýmsum baráttumálum, svo sem málfrelsi og fleira á alþjóðavísu meðal höfunda,“ segir Egill Örn en þorir að öðru leyti lítt að spá í þessi spil.

Veðjað á Jón og Sjón

Vegir nefndarinnar eru af þeim sem Vísir ræddi við og þekkja vel til, órannsakanlegir. Stundum fer þetta eftir því hvort einhver nefndarmaður er nógu ákveðinn stuðningsmaður einhvers og svo framvegis. Erfitt er að setja putta á hvað ræður. Komið að Íslandi? Því ekki það, segir einn álitsgjafa Vísis og bendir á að ekki nokkur maður hafi leyft sér að spá því að Elfriede Jelinek fengi Nóbel.

Það liggur því fyrir að talsverð heppni verður að vera með í spilinu ef menn ætla sér að veðja á hvað verður á morgun. Blaðamaður Vísis ætlar þó að henda sitt hvorum þúsund krónunum á Jón og svo Sjón. Og til að setja aukna spennu í þann leik fer þriðji þúsund kallinn á ungverjann László Krasznahorkai, en hann er með stuðulinn 30 á Betsson.