Telja að fíkniefnaneysla hafi aldrei verið meiri en nú

Lögreglan telur að fullyrða megi að fíkniefnaneysla hafi aldrei verið meiri í sögu landsins. Þessa þróun má rekja til bjölgun ferðamanna, fjölgun landsmanna og efnahagslegs uppgangs.

Þetta kemur fram í nýrri skýrslu greiningardeildar Ríkislögreglustjóra. Þar segir að undanfarin ár hafi mest borið á neyslu örvandi efna og kannabis en tilvik hafi komið upp þar sem neytt sé dýrari og sterkari fíkniefna. Til marks um þetta hafi kristallað metamfetamín (e. Crystal Meth), afar sterkt og ávanabindandi fíkniefni, sést í fyrsta skiptia uglýst hér á landi. Samkvæmt þeirri auglýsingu er markaðsverð efnisins afar hátt, rúmar 80 þúsund krónur grammið.

Þá virðist neysla kókaíns aukast ört líkt en frá árinu 2015 hafa hafa mörg burðardýr verið tekin í Flugstöð Leifs Eiríkssonar með kókaín, oft á leið frá Hollandi. Þá hefur lögregla á undanförnum tveimur árum orðið vör við innflutning á hráefnum til framleiðslu fíkniefna.

„Hugviti glæpamanna við innflutning fíkniefna eru lítil takmörk sett. Þannig var í einu tilviki efni sem unnt var að vinna kókaín úr mótað í ferðatösku. Slík starfsemi krefst þekkingar og fjármagns.“

Á Íslandi hefur þróunin í ræktun kannabis verið í þá átt að þeir umsvifamestu standa samtímis að nokkrum ræktunum í stað þess að binda alla framleiðsluna við eina stóra verksmiðju, að því er kemur fram í skýrslunni.

Þar segir einnig að stórfelld og skipulögð ræktun á kannabis geti skapað mikinn hagnað með lítilli fyrirhöfn og lítilli áhættu meðal annars sökum vægra refsinga. Það sé reynsla lögreglu að Íslendingar komi einkum við sögu í ræktun kannabis.

„Oft eru gerendur ungir karlmenn sem fá skjótfenginn gróða af ræktun og sölu. Þess þekkjast dæmi að ræktanir séu liður í fjármögnun húsbygginga og fari fram í húsnæðinu þegar það er fokhelt,“ að því er kemur fram í skýrslunni.