Bjarni í miklum samskiptum við Glitni fram yfir hrun

Bjarni Benediktsson, forsætisráðherra og formaður Sjálfstæðisflokkurinn var í miklum samskiptum við lykilmenn hjá Glitni frá 2003 fram yfir hrun 2008 í gegnum netfang sitt hjá Alþingi sem og hjá BNT hf. þar sem hann var stjórnarformaður.

Þetta kemur fram í gögnum sem fréttastofa RÚV hefur undir höndum. Bjarni var þingmaður á þessum tíma en segir að samskiptin hafi verið eðlileg.

Í frétt RÚV segir einnig að samkvæmt skýrslu sem KMGP hafi unnið fyrir slitastjórn Glitnis í lok árs 2008 hafi Fjármálaeftirlitið skilgreint þá sem komu að undirbúningi þjóðnýtingar Glitnis sem innherja. Voru þar meðal annars þingmenn, embættismenn og ráðgjafar og var nafn Bjarna þar á meðal.

Þá segir einnig að þau gögn sem RÚV hafi undir höndum bendi ekki til þess að slitastjórn Glitnis hafi talið að Bjarni hafi framið lögbrot með viðskiptum sínum en greint hefur verið frá því að Bjarni hafi tekið 50 milljónir út úr sjóði 9 dagana fyrir hrun hinn 8.október 2008.

Á meðan þau samskipti sem fjallað er um á RÚV áttu sér stað var Bjarni þingmaður. Í samtali við RÚV segir hann að miðað við stöðu hans sem stjórnarformaður í félagi sem átti í miklum viðskiptum við Glitni sé ekkert óeðlilegt við að hann hafi átt í samskiptum við bankann.

„Svo lengi sem menn geta ekki bent á neitt óeðlilegt í samskiptunum sjálfum þá er ekkert nýtt í þessu,“ segir Bjarni í samtali við RÚV um þessi samskipti.





Fékk kynningu á „spennandi díl“ fyrir Falson

Í gögnunum sem RÚV hefur undir höndum kemur einnig fram að Bjarni og viðskiptafélagar hans hafi stefnt að því að nota Falson & Co, aflandsfélag sem skráð á Seychelles-eyjum og fjallað var um í Panama-skjölunum, til þess að fjárfesta í Miami í Bandaríkjunum.

Fór Bjarni sjálfur til Miami þar sem hann fékk kynningu á verkefni sem hann stakk upp á því að hann og viðskiptafélagar hans myndu fjárfesta í, í gegnum Falson.

„Er í Nicaragua á vegum þingsins. Stoppaði á Miami um síðust helgi á leiðinni niðureftir. Fékk kynningu á mjög spennandi díl. Spurning hvort við eigum að skoða hann saman í Falson. Þetta er á algjörlega brjáluðum stað neðst á South Beach,“ skrifar Bjarni til viðskiptafélaga að því er RÚV greinir frá.

Þegar Bjarni útskýrði tilgang Falson & Co eftir að greint var frá því að þrír ráðherrar ættu eða tengdust aflandsfélögum í skattaskjólum sagði hannn að eini tilgangur félagsins hafi verið að halda utan um fastiegn í Dúbaí.

Í gögnunum kemur fram að Bjarni hafi notað tölvupóstfang sitt hjá Alþingi til þess að eiga í samskiptum aðila út í Bandaríkjunum í tengslum við málið.

Aðspurður um hvort að eðlilegt geti talist að þingmaður noti netfangt sitt hjá alþingi í slíkum samskiptum sagði Bjarni að margir könnuðust ef til vill við það að fá erindi í gegnum vinnupóstinn, að því er kemur fram á vef RÚV.