Talsamband er komið á milli Sigurðar Inga og Sigmundar

Talsamband er komið á milli Sigurðar Inga Jóhannssonar, formanns Framsóknarflokksins, og Sigmundar Davíðs Gunnlaugssonar, formanns Miðflokksins. Þetta herma öruggar heimildir Fréttablaðsins. Sigurður Ingi átti frumkvæði að samskiptunum og ræddust þeir við í síma í gær.

Eins og kunnugt er höfðu deilur kraumað innan Framsóknarflokks allt frá vormánuðum 2016 sem enduðu með klofningi í aðdraganda nýafstaðinna kosninga þegar Miðflokkur Sigmundar Davíðs Gunnlaugssonar varð til og vann góðan sigur í kosningunum.

Framsóknarmenn eiga nú aðild að óformlegum viðræðum um stjórnarmyndun við Vinstri græn, Pírata og Samfylkingu. Þrátt fyrir þær er ljóst að allir eru að tala saman, bæði innan og utan þeirra viðræðna, enda flókin staða í kortunum. Sjálfstæðismenn og Miðflokksmenn ræðast mjög við og náið er með Framsóknarmönnum og Sjálfstæðismönnum venju samkvæmt. Þá gæti spennan verið að slakna milli þeirra Sigmundar Davíðs og Sigurðar Inga sem galopnar á möguleika á stjórnarmyndunarviðræðum milli Framsóknarflokks, Miðflokks, Sjálfstæðisflokks og Flokks fólksins.

Katrín Jakobsdóttir fundaði stíft í gær með fulltrúum Samfylkingar, Pírata og Framsóknarflokks. Málefni voru í fyrsta skipti rædd milli flokkanna fjögurra og auk þeirra mála sem allir flokkarnir settu á oddinn í nýafstöðnum kosningum; frekari uppbyggingar í velferðarmálum og menntamálum, hefur stjórnarskrána borið á góma í viðræðunum og bjart er yfir umræðum flokkanna um breytingar á stjórnarskrá samkvæmt heimildum blaðsins.

Þá munu Evrópumálin ekki þvælast fyrir í mögulegu stjórnarsamstarfi þessara flokka samkvæmt heimildum blaðsins og ekki eru hafðar uppi kröfur um þjóðar­atkvæðagreiðslu um aðildarviðræður af hálfu neins flokks sem aðild á að þessum viðræðum.

Til að styrkja þann meirihluta sem þessir fjórir flokkar gætu myndað hafa ýmsar leiðir verið ræddar. Auk þess möguleika að fá Viðreisn eða Flokk fólksins að borðinu, hefur Katrín ítrekað nefnt kosti þess að vinnubrögðin á Alþingi taki breytingum í þágu þverpólitísks samráðs þannig að mál séu unnin meira þvert á flokka.

Í vinstri stjórninni 2009 til 2013 hafði stjórnin misst meirihluta í mjög mörgum málum og til að koma málum í gegn reiddi hún sig á óformlegt bandalag við þrjá þingmenn Hreyfingarinnar og einnig um tíma við Guðmund Steingrímsson. Á þetta bendir Eiríkur Bergmann, prófessor í stjórnmálafræði, spurður um þessar hugmyndir Katrínar. Hann bendir þó á að margar aðrar útfærslur minnihlutastjórna eða stjórna með nauman meirihluta séu færar.