Guðni boðar Katrínu á sinn fund

Forseti Íslands Guðni Th. Jóhannesson hefur boðað Katrínu Jakobsdóttur, formann Vinstri hreyfingarinnar – græns framboðs, til fundar við sig á Bessastöðum á morgun, þriðjudaginn 28. nóvember, kl. 10:30.

Viðræður Vinstri grænna, Sjálfstæðisflokks og Framsóknarflokks hafa borið árangur og hafa formenn flokkanna kynnt málefnasamninginn fyrir þingmönnum sínum í dag. Þá hafa formenn fundað með formönnum annarra flokka varðandi fjárlagafrumvarpsgerð og hvenær þing geti komið saman.

Ekki liggur fyrir hvernig flokkarnir skipti með sér ráðuneytum. Þó liggur fyrir að í viðræðunum hefur verið lagt upp með að Katrín yrði forsætisráðherra í nýrri ríkisstjórn.