Sjaldgæfur þurrkur í vestlægri átt

Það verður fremur hvasst á norðanverðu landinu á morgun og sérstaklega hvasst í kringum Öræfi. Meðal vindhraði getur náð 23 – 25 metrum á sekúndu samkvæmt upplýsingum frá Veðurstofu Íslands og geta hviður náð tvöföldum þeim hraða þegar mest er.

Það mun hvessa í kvöld og fram eftir nóttu og mun ekki byrja að lægja fyrr en eftir hádegi á morgun og verður fremur hvasst fram eftir degi.

Veðurstofan segir þó að það sé fremur sjaldgæft að spáð sé svo þurri vestlægri átt. Slíkri átt fylgi yfirleitt raki og það af því að kalt loft af Grænlandsjökli blási yfir Grænlandssund. Loftið frá Grænlandsjökli sé yfirleitt mun kaldara en yfirborð sjávar og þá stígi rakinn upp og myndi bólstra sem færa él eða skúrir yfir landið.

Nú sé hins vegar loftið sem kemur af Grænlandsjökli fremur milt og sjórinn fremur kaldur og þá myndast sáralítil ef þá nokkur él. Það gæti því létt ágætlega til og orðið býsna fallegt veður á morgun.

Skýjahuluspáin sé þurr en hins vegar gefur loftrakaspá fyrir tveggja metra hæð aðra mynd og gæti því orðið létt yfir fram að hádegi á morgun, en þykknar upp eftir hádegi.

Veðurhorfur á landinu næstu daga:

Á morgun:

Dregur smám saman úr vindi á morgun, 8-15 og stöku él annað kvöld, hvassast SA-til. Hiti nálægt frostmarki.

Á sunnudag:

Vestlæg eða breytileg átt, 3-8 m/s og skýjað með köflum, en þurrt að kalla. Frostlaust við S- og V-ströndina, annars vægt frost. Líkur á smá rigningu eða slyddu SV-lands um kvöldið.

Á mánudag:

Suðvestlæg átt, 3-10 og rigning eða slydda, en yfirleitt þurrt austantil. Vægt frost NA- og A-lands, en annars 0 til 6 stig, mildast við S-ströndina.

Á þriðjudag og miðvikudag:

Gengur í norðan 8-15 með snjókomu eða éljum og kólnandi veðri, en léttir til syðra.

Á fimmtudag:

Lægir smám saman og rofar til, en talsvert kalt í veðri.

Á föstudag:

Útlit fyrir SV-læga átt með ofankomu, en úrkomulítið N- og A-lands. Hlánar SV-lands en annars frost.