Lárus Welding ætlar að áfrýja Stím-dómnum

Lárus Welding, fyrrverandi forstjóri Glitnis, ætlar að áfrýja fimm ára fangelsisdómi sem hann hlaut vegna Stím-málsins svokallaða í Héraðsdómi Reykjavíkur í gær. 

Þetta segir Óttar Pálsson, verjandi Lárusar, í samtali við Vísi.

Jóhannes Baldursson, fyrrverandi framkvæmdastjóri markaðsviðskipta Glitnis, var dæmdur í tveggja ára fangelsi og Þorvaldur Lúðvík Sigurjónsson, fyrrverandi forstjóri Sögu Capital í 18 mánaða fangelsi.

Þorvaldur mætti við dómsuppkvaðningu í gær og sagðist ætla að áfrýja dómnum til Hæstaréttar. Þá mun Jóhannes einnig áfrýja sínum dómi til Hæstaréttar.

Dómarnir sem féllu í gær eru þeir sömu og féllu fyrir nákvæmlega tveimur árum síðan í héraði en aðalmeðferð máls hafði verið tekin upp aftur í héraðsdómi eftir að Hæstiréttur úrskurðaði um að einn dómara málsins hefði verið vanhæfur. Kostnaður við endurtekna málsmeðferð í héraði fellur á ríkissjóð.

Ingimundur Einarsson, einn þriggja dómara málsins, skilaði sératkvæði og vildi sakfella Lárus en sýkna þá Jóhannes og Þorvald.

Forsaga málsins er sú að félagið Stím fékk tæplega 20 milljarða króna lán frá Glitni til að kaupa hlutabréf í Glitni og FL Group í nóvember árið 2007. Seljandi bréfanna var Glitnir en um var að ræða rúmlega 4 prósenta hlut í hvoru tilfelli. Veðin fyrir láni Stíms voru í hlutabréfunum í Glitni og FL Group.